جئے کشن کا انتقال کانگریس کے لیے بڑا خسارہ، وہ پارٹی میں اہم دلت چہرہ تھے: دیویندر یادو

کانگریس لیڈر اور سابق رکن اسمبلی 66 سالہ جئے کشن کے انتقال سے پارٹی لیڈران میں غم کا ماحول دیکھنے کو مل رہا ہے۔ دہلی کانگریس صدر دیویندر یادو نے ان کے انتقال پر اپنے گہرے صدمہ کا اظہار کرتے ہوئے کہا کہ ’’جئے کشن کے اچانک انتقال سے دہلی کانگریس فیملی کو بڑا خسارہ ہوا ہے۔ اس خلا کو بھرا نہیں جا سکتا۔ وہ کانگریس میں ایک اہم دلت چہرہ تھے، جو 4 مرتبہ سلطان پوری اسمبلی حلقہ سے منتخب ہو کر اسمبلی پہنچے اور سلطان پوری کی عوام کی خدمت میں مصروف رہے۔‘‘

آج وائی بلاک سلطان پوری واقع شمشان گھاٹ پر جئے کشن کے جسد خاکی کو ’مکھاگنی‘ ان کے بڑے بیٹے راہل ڈھاکا نے دی۔ اس غمگین ماحول میں جئے کشن کے اہل خانہ کے اراکین کے ساتھ ریاستی صدر دیویندر یادو، دہلی کے کئی سابق اراکین اسمبلی، کانگریس عہدیداران اور کانگریس لیڈران موجود تھے۔ سبھی نے آنجہانی جئے کشن کو خراج عقیدت پیش کیا۔ آخری رسومات ادا کیے جانے سے قبل کانگریس صدر ملکارجن کھڑگے اور لوک سبھا میں حزب اختلاف کے قائد راہل گاندھی کی طرف سے جئے کشن کے جسد خاکی پر پھولوں کی ریتھ چڑھا کر خراج عقیدت پیش کیا گیا۔ کھڑگے نے جئے کشن کی شریک حیات سے فون پر بات بھی کی اور ہمدردی ظاہر کرتے ہوئے مشکل وقت میں ساتھ کھڑے رہنے کا یقین دلایا۔

جئے کشن کی آخری رسومات میں شامل دیویندر یادو نے کہا کہ وہ پارٹی کے لیے وقف کارکنان میں شامل تھے۔ زندگی بھر وہ لوگوں کی خدمت کرتے رہے اور دلت و محروم طبقات کے لوگوں کی ترقی و سماجی مضبوطی کے لیے اہم تعاون دیا۔ دہلی کانگریس صدر نے مزید کہا کہ ’’میں خود کانگریس کنبہ کی طرف سے آنجہانی روح کے اچانک انتقال پر ان کے غمزدہ کنبہ کے اراکین و رشتہ داروں کے تئیں ہمدردی ظاہر کرتا ہوں، اور جئے کشن کو پرخلوص خراج عقیدت پیش کرتا ہوں۔‘‘