آج واضح ہو گیا کہ کشمیر میں حالات معمول پر نہیں ہیں: راہل

نئی دہلی: کانگریس لیڈر راہل گاندھی نے سری نگر ہوائی اڈے سے لوٹائے جانے کے بعد ہفتہ کے روز یہاں کہا کہ اب یہ واضح ہوگیا ہے کہ جموں و کشمیر میں حالات معمول پر نہیں ہیں۔

راہل گاندھی نے وادی کشمیر کے حالات کا جائزہ لینے گئے سیاستدانوں کے وفود کو سری نگر ہوائی اڈے سے واپس لوٹائے جانے کے بعد یہاں پہنچنے پر صحافیوں کو بتایاکہ ’’کچھ دنوں قبل مجھے جموں و کشمیر کے دورے کے لئے گورنر نے مدعو کیا تھا، میں نے دعوت قبول کر لی تھی۔ ہم وہاں کے لوگوں کے جذبات جاننا چاہتے تھے، لیکن ہمیں ہوائی اڈے سے باہر نکلنے کی اجازت نہیں دی گئی۔ ہمارے ساتھ گئے میڈیا کے ساتھ دھکا مکی کی گئی۔ یہ واضح ہے کہ جموں و کشمیر میں حالات معمول پرنہیں ہیں‘‘۔

اپوزیشن لیڈروں کے ساتھ سری نگر گئے کانگریس کے سینئر لیڈر اور جموں و کشمیر کے سابق وزیر اعلی غلام نبی آزاد نے صحافیوں کو بتایاکہ ’’ہمیں شہر میں جانے کی اجازت نہیں دی گئی، لیکن جموں و کشمیر کی حالت انتہائی خراب ہے۔ ہمارے جہاز میں موجود کشمیری مسافروں سے جو کہانیاں سنی اسے سن کر ایک پتھر بھی رو پڑے گا‘‘۔

کانگریس کے ان لیڈروں کے ساتھ اپوزیشن جماعتوں کا 12 رکنی وفد بھی گیا تھا۔ وفد میں کانگریس کے سینئر لیڈر آنند شرما اور کے سی وینو گوپال، مارکسی کمیونسٹ پارٹی کے لیڈر سیتا رام یچوری، لوک تانترک جنتا دل کے شرد یادو، ڈی ایم کے کے لیڈر تروچي شیوا، نیشنلسٹ کانگریس پارٹی کے لیڈر ماجد مینن، کمیونسٹ پارٹی آف انڈیا کے لیڈر ڈی راجہ، ترنمول کانگریس دنیش ترویدی اور راشٹریہ جنتا دل کے ترجمان منوج جھا بھی تھے۔

گورنر ستیہ پال ملک کی راہل گاندھی کو زمینی حالات کا جائزہ لینے کے لئے وادی کشمیر کے دورے کی دعوت دیئے جانے کے بعد اپوزیشن لیڈروں کا یہ دورہ ہوا۔