موبائل ٹاور کے قیمتی آلات چوری کرنے والا گروہ بے نقاب، سرغنہ سمیت 8 افراد گرفتار

نوئیڈا: کرائم ریسپانس ٹیم اور تھانہ سورج پور پولیس کی مشترکہ کارروائی میں ایک بڑے بین الریاستی چوری کے گروہ کا پردہ فاش ہوا ہے جو موبائل ٹاورز سے آر آر یو (ریموٹ ریڈیو یونٹ) جیسے قیمتی آلات چوری کرتا تھا۔ اس کارروائی میں پولیس نے گروہ کے سرغنہ سمیت آٹھ ملزمان کو گرفتار کیا ہے اور ان کے قبضے سے تقریباً 3.50 کروڑ روپے مالیت کے چوری شدہ آلات برآمد کیے گئے ہیں۔

ڈی سی پی سینٹرل نوئیڈا شکتی موہن اوستھی نے بتایا کہ گرفتار کیے گئے افراد میں گروہ کا سرغنہ عباس ملک، سلیم ملک، سہیل قریشی، شاہنواز، شانو ملک، شانو، عمران اور سلمان قریشی شامل ہیں۔ ان ملزمان کے قبضے سے 35 آر آر یو یونٹس، کئی بیٹریاں، موبائل ٹاور کے دیگر قیمتی پرزے اور چوری میں استعمال ہونے والی ایک ویگن آر کار و موٹر سائیکل بھی برآمد کی گئی ہے۔

پولیس کے مطابق یہ گروہ دن میں مختلف علاقوں میں موبائل ٹاورز کی ریکی کرتا تھا اور رات کے وقت نوئیڈا، این سی آر اور دیگر ریاستوں میں موبائل ٹاورز سے آر آر یو، بیٹریاں اور دیگر قیمتی آلات چوری کرتا تھا۔ بعد ازاں یہ چوری شدہ سامان مقامی کباڑیوں کو فروخت کر دیا جاتا تھا، جو انہیں پرزہ جات کے طور پر چین بھیج دیتے تھے۔

ابتدائی تفتیش میں یہ بات بھی سامنے آئی ہے کہ اس گروہ کے خلاف سہارنپور، دہلی اور ہریانہ میں بھی چوری کے مقدمات درج ہیں۔ پولیس اس نیٹ ورک سے وابستہ دیگر افراد، خاص طور پر وہ کباڑیے جو ان سے سامان خریدتے تھے اور اس کارروائی کو مالی معاونت فراہم کرنے والوں کی بھی تلاش میں ہے۔

ڈی سی پی نے بتایا کہ یہ گروہ ایک منظم نیٹ ورک کے تحت کام کرتا تھا اور ہر رکن کا مخصوص کردار ہوتا تھا۔ کچھ افراد ٹاور کی شناخت اور ریکی کرتے تھے، کچھ لوگ چوری کرتے تھے، جبکہ باقی سامان کی نقل و حمل اور فروخت کا انتظام سنبھالتے تھے۔

اس اہم کامیابی پر پولیس کمشنر کی جانب سے اس کارروائی میں شامل اہلکاروں کے لیے 25 ہزار روپے کے انعام کا اعلان بھی کیا گیا ہے۔ پولیس کا کہنا ہے کہ مزید گرفتاریاں متوقع ہیں اور اس کیس کی تفتیش جاری ہے تاکہ اس پورے نیٹ ورک کو جڑ سے اکھاڑا جا سکے۔