ایس آئی آر کے معاملے پر انڈیا اتحاد الیکشن کمیشن کے دفتر تک مارچ کرے گا

انڈیا اتحاد پارلیمنٹ کے مانسون اجلاس کے پہلے دن سے بہار اسمبلی انتخابات سے قبل ووٹر لسٹ کی خصوصی نظر ثانی کے خلاف آواز اٹھا رہا ہے اور احتجاج کر رہا ہے۔ اب انڈیا اتحاد الیکشن کمیشن کے خلاف مارچ اور عوامی بیداری مہم چلا کر اسے قومی سیاسی مسئلہ بنانے کے لیے قدم بڑھا رہا ہے۔

ذرائع نے جمعرات کے روز بتایا کہ انڈیا الائنس نے 8 اگست کو الیکشن کمیشن کے صدر دفاتر تک مارچ کرنے کا منصوبہ بنایا ہے اور پارلیمنٹ کے اندر اور باہر ایس آئی آر کے معاملے پر اپنا احتجاج جاری رکھنے کا فیصلہ کیا ہے۔ ذرائع کے مطابق کل صبح انڈیا الائنس کی میٹنگ میں اس معاملے پر غور کیا گیا اور انڈیا الائنس میں شامل تمام پارٹیوں نے متفقہ طور پر فیصلہ کیا ہے کہ بہار میں جاری ایس آئی آر پروسس پر پارلیمنٹ کے مانسون اجلاس میں بحث کی جائے۔

اس میٹنگ میں متعدد اپوزیشن جماعتوں کے لیڈران موجود تھے، جن میں راجیہ سبھا میں اپوزیشن لیڈر ملک ارجن کھڑگے، لوک سبھا میں اپوزیشن لیڈر راہل گاندھی، ترنمول کانگریس کے ڈیرک اوبرائن، ڈی ایم کے کے ٹی آر بالو، ایس پی کے رام گوپال یادو، این سی پی (ایس پی) کی سپریا سولے، سی پی آئی (ایم ایل) کے راجہ رام سنگھ، سی پی ایم کے جان برٹاس، سی پی آئی کے پی سنتوش کمار شامل ہيں۔