تین ہندوستانی ملاحوں کی ہلاکت: وزیر خارجہ جے شنکر نے مارکو روبیو کو فون کر کے درج کرایا سخت احتجاج

نئی دہلی: خلیج عمان میں ایک تجارتی جہاز پر امریکی بحریہ کے حملے میں تین ہندوستانی ملاحوں کی ہلاکت کے بعد ہندوستان نے امریکہ کے سامنے سخت احتجاج درج کرایا ہے۔ وزیر خارجہ ایس جے شنکر نے کہا ہے کہ انہوں نے امریکی وزیر خارجہ مارکو روبیو سے بات کر کے اس واقعے پر ہندوستان کی شدید ناراضگی کا اظہار کیا۔

ایس جے شنکر نے سوشل میڈیا پلیٹ فارم ایکس پر جاری اپنے بیان میں کہا کہ انہوں نے مارکو روبیو سے گفتگو کے دوران خلیج میں امریکی بحریہ کے حملوں کے خلاف ہندوستان کا سخت احتجاج دہرایا۔ ان کے بقول ان حملوں میں تین ہندوستانی ملاح ہلاک ہوئے ہیں اور تجارتی جہاز رانی کے خلاف اس طرح کی جان لیوا کارروائیاں کسی بھی صورت میں درست نہیں ہیں۔

یہ واقعہ گزشتہ دنوں عمان کے ساحل کے قریب پیش آیا تھا، جہاں تیل بردار تجارتی جہاز ’ایم ٹی سیٹے بیلو‘ امریکی بحریہ کے حملے کی زد میں آ گیا تھا۔ پلاؤ کے جھنڈے والے اس جہاز پر مجموعی طور پر 24 ہندوستانی عملے کے ارکان سوار تھے۔ حملے کے بعد جہاز میں افراتفری مچ گئی اور فوری طور پر امدادی و بچاؤ کارروائیاں شروع کی گئیں۔

امدادی کارروائیوں کے نتیجے میں 21 ہندوستانی شہریوں کو بحفاظت بچا لیا گیا، تاہم تین ملاح لاپتا ہو گئے تھے۔ بعد ازاں ان تینوں کی ہلاکت کی سرکاری طور پر تصدیق کر دی گئی۔ ہلاک ہونے والوں کی شناخت ڈیک کیڈٹ آدتیہ شرما، انجن فٹر شیوانند چورسیا اور چیف انجینئر پٹنالا سریش کے طور پر کی گئی ہے۔

واقعے کے بعد حکومت ہند نے سفارتی سطح پر بھی سخت ردعمل ظاہر کیا۔ نئی دہلی میں تعینات امریکی ناظم الامور کو وزارت خارجہ طلب کیا گیا اور اس معاملے پر ہندوستان کے شدید تحفظات سے آگاہ کیا گیا۔ ہندوستان نے اس بات پر تشویش ظاہر کی کہ ہندوستانی ملاحوں کو لے جانے والے ایک تجارتی جہاز کو نشانہ بنائے جانے سے قیمتی جانوں کا نقصان ہوا۔

وزارت خارجہ کے ترجمان رندھیر جیسوال نے بھی کہا کہ ہندوستانی عملے کے ارکان کو لے جانے والے تجارتی جہازوں کے خلاف امریکی بحریہ کی ایسی کارروائیاں فوری طور پر بند ہونی چاہئیں۔ انہوں نے زور دیا کہ خلیج کے خطے میں امن اور استحکام کی بحالی کے لیے طاقت کے استعمال کے بجائے بات چیت اور سفارتی ذرائع کو ترجیح دی جانی چاہیے۔

دریں اثنا کانگریس نے بھی اس معاملے پر مودی حکومت کو نشانہ بنایا ہے۔ لوک سبھا میں قائد حزب اختلاف راہل گاندھی نے کہا کہ گزشتہ چند دنوں کے دوران تین مختلف تجارتی جہاز امریکی کارروائیوں کا شکار ہوئے ہیں، جن میں تین ہندوستانی ملاح ہلاک ہوئے، لیکن وزیر اعظم نریندر مودی نے اس بارے میں ایک لفظ تک نہیں کہا۔

راہل گاندھی نے کہا کہ آئندہ ہفتے وزیر اعظم جی-7 اجلاس میں عالمی رہنماؤں سے ملاقات کریں گے، مگر ہلاک ہونے والے ہندوستانی ملاحوں کے لیے اظہار افسوس تک نہیں کیا گیا۔ انہوں نے الزام لگایا کہ کمپرومائزڈ پی ایم ’بھارت ماتا‘ کے بیٹوں کی حفاظت نہیں کر سکتا۔ کانگریس نے حکومت سے مطالبہ کیا ہے کہ وہ اس معاملے پر مؤثر سفارتی اقدامات کرے اور ذمہ داروں سے جواب طلب کرے۔