چھتیس گڑھ کانگریس رہنماؤں کی آج دہلی میں میٹنگ

دہلی میں آج  چھتیس گڑھ کانگریس کے رہنماؤں کی ایک میٹنگ منعقد ہوگی، جس میں چھتیس گڑھ میں نئے ضلع صدور کے ناموں پر مہر لگنے کی توقع ہے۔ چھتیس گڑھ کانگریس کے ریاستی صدر دیپک بیج  کل  شام دہلی پہنچ گئے ہیں تاکہ اس میٹنگ میں شرکت کر سکیں۔

کانگریس کے سینئر رہنما اور پارٹی کے سابق صدر راہل گاندھی کی طرف سے جاری پارٹی کو مضبوط کرنے کی کوششوں کے تحت، پارٹی سطح پرایک تیزمہم چلائی جا رہی ہے۔ اس مہم کے حصے کے طور پر مختلف ریاستوں کے رہنماؤں کو ایک ایک کر کے دہلی بلایا جا رہا ہے تاکہ ضلع صدور کی تقرری کے سلسلے میں غور و خوض کیا جا سکے۔

اسی سلسلے میں چھتیس گڑھ کے تمام سینئر رہنماؤں کو دہلی بلایا گیا ہے، جن میں ریاستی صدر دیپک بیج، سابق وزیر اعلیٰ بھوپیش بگھیل، اپوزیشن لیڈر ڈاکٹر چرنداس مہنت اور چھتیس گڑھ کانگریس کے کئی دیگر رہنما شامل ہیں۔

مذکورہ مہم کے تحت، چھتیس گڑھ کے تمام کانگریس مبصرین نے  ضلع صدور کے تقرری کے بارے میں اپنی رپورٹس پارٹی قیادت کو سونپ دی ہیں۔ انہی رپورٹس کی بنیاد پر اور قیادت کی منظوری کے بعد نئے ضلع صدور کی تعیناتی کی جائے گی۔ ذرائع کے مطابق، چھتیس گڑھ کے کئی اضلاع میں ضلع صدور کو تبدیل کیا جائے گا اور نوجوان اور پارٹی کے تئیں وقف کارکنوں کو مواقع ملنے کی توقع ہے۔

چھتیس گڑھ میں ضلع صدور کے انتخاب کے لیے 17مبصرین کی ٹیم تشکیل دی گئی تھی۔ ان مبصرین نے 8 اکتوبر سے 20 اکتوبر کے درمیان ریاست کے مختلف اضلاع کا دورہ کیا، ضلع صدور کے انتخاب کے لیے درخواستیں جمع کیں، رہنماؤں سے ملاقات کی اور اپنی حتمی رپورٹ دہلی میں جمع کرائی۔ چھتیس گڑھ کے رہنماؤں سے ملاقات کے بعد، ضلع صدور کی تقرری اکتوبر کے آخر تک مکمل کی جائے گی۔