امید ہے الیکشن کمیشن بہار کی حتمی ووٹر لسٹ میں موجود غلطیوں کی اصلاح کرے گا: سپریم کورٹ
سپریم کورٹ کی بنچ نے اعتراف کیا کہ کچھ اسمبلی حلقوں میں ووٹر لسٹ 17 اکتوبر کو فریز ہو جائے گی، کیونکہ وہاں پہلے مرحلہ میں ووٹ ڈالے جائیں گے۔ دیگر اسمبلی حلقوں میں ووٹر لسٹ 20 اکتوبر کو فریز ہوگی۔

بہار میں ایس آئی آر (ووٹر لسٹ کی خصوصی گہری نظرثانی) کے جاری فائنل ووٹر لسٹ سے متعلق سپریم کورٹ نے آج انتہائ اہم تبصرہ کیا۔ 16 اکتوبر کو ہوئی سماعت کے دوران عدالت عظمیٰ نے کہا کہ ’’امید ہے الیکشن کمیشن بہار کی حتمی ووٹر لسٹ میں ٹائپنگ اور دیگر غلطیوں کی اصلاح کرے گا۔‘‘ جسٹس سوریہ کانت اور جسٹس جوئے مالیا باغچی کی بنچ نے اب اس معاملے پر آئندہ سماعت کے لیے 4 نومبر کی تاریخ مقرر کی ہے۔
آج کی سماعت کے دوران الیکشن کمیشن نے کہا کہ 30 ستمبر کو اس کے ذریعہ شائع فائنل ووٹر لسٹ سے متعلق اب تک ایک بھی اعتراض درج نہیں کرایا گیا۔ حالانکہ عرضی دہندہ اے ڈی آر کی طرف سے پیش ہوئے ایڈووکیٹ پرشانت بھوشن نے کہا کہ ایک ووٹر کے ذریعہ یہ دعویٰ کیا گیا ہے کہ اس کا نام ووٹر لسٹ میں نہیں جوڑا گیا تھا، جسے الیکشن کمیشن نے 7 اکتوبر کو سماعت میں فرضی بتایا تھا، لیکن ووٹر کا دعویٰ سچ ہے۔ انھوں نے کہا کہ الیکشن کمیشن کو بتانا چاہیے کہ کتنے ووٹرس کے نام حتمی ووٹر لسٹ سے حذف کیے گئے ہیں۔
اس درمیان بنچ نے اعتراف کیا کہ کچھ اسمبلی حلقوں میں ووٹر لسٹ 17 اکتوبر کو فریز ہو جائے گی، کیونکہ وہاں پہلے مرحلہ میں ووٹ ڈالے جائیں گے۔ دیگر اسمبلی حلقوں میں ووٹر لسٹ 20 اکتوبر کو فریز ہوگی، جہاں دوسرے مرحلہ میں ووٹنگ ہوگی۔ گزشتہ سماعت میں عدالت عظمیٰ نے الیکشن کمیشن سے ان 3.66 لاکھ ووٹرس کی تفصیل دینے کو کہا تھا جو ڈرافٹ ووٹر لسٹ کا حصہ تھے لیکن فائنل ووٹر لسٹ سے باہر کر دیے گئے۔ اس تعلق سے عدالت نے کہا کہ معاملہ مبہم ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔