جھارکھنڈ اسمبلی میں انسداد موب لنچنگ بل دوبارہ لائے گی ہیمنت سورین حکومت، گورنر نے کر دیا تھا واپس

یہ بل جھارکھنڈ اسمبلی نے پہلے بھی منظور کئے تھے لیکن ان کے ہندی-انگریزی ترجمہ میں تضاد کی وجہ سے گورنر نے انہیں بغیر دستخط کئے واپس کر دیا تھا۔

تصویر سوشل میڈیا
تصویر سوشل میڈیا
user

قومی آوازبیورو

رانچی: جھارکھنڈ اسمبلی کا مانسون اجلاس 29 جولائی سے شروع ہونے جا رہا ہے۔ کل 6 کام کے دنوں والے اس اجلاس میں ریاستی حکومت نے انسداد موب لنچنگ بل اور ریاست میں قبائلی یونیورسٹی سے متعلق اہم بل دوبارہ لانے کی تیاری کی ہے۔ یہ دونوں بل اسمبلی نے پہلے بھی منظور کئے تھے لیکن ان کے ہندی-انگریزی ترجمہ میں تضاد کی وجہ سے گورنر نے انہیں بغیر دستخط کئے واپس کر دیا تھا۔

اجلاس کی تیاریوں کو لے کر اسپیکر کی جانب سے طلب کئے گئے کل جماعتی اجلاس میں ریاست میں قحط سالی کی صورت حال پر خصوصی تبادلہ خیال کرنے پر اتفاق کیا گیا ہے۔ ریاستی حکومت رواں مالی سال کے لئے سپلیمنٹری بجٹ بھی پیش کرے گی۔


حزب اختلاف کی اہم جماعت بی جے پی نے اجلاس کے دوران ریاست میں غیر قانونی کانکنی، رانچی میں خاتون سب انسپکٹر کا قتل، سرکاری اسکولوں میں جمعہ کی چھٹی جیسے مسائل پر حکومت کا محاصرہ کرنے کی حکمت عملی تیار کی ہے۔

اسمبلی اسپیکر رویندر ناتھ مہتو نے ریاست کے تمام محکموں کے عہدیداروں کو ایوان کے افسران کے اسٹینڈ میں موجود رہنے کی ہدایت دی ہے۔ چیف سکریٹری کو ہدایت دی گئی ہے کہ محکموں کے افسران کی اجلاس کے دوران موجودگی یقینی بنائیں، تاکہ حکومت کی جانب سے ارکان کے سوالوں کے جواب مناسب طریقہ سے دیئے جا سکیں۔


انہوں نے حکومت کے محکموں کو یہ بھی ہدایت دی ہے کہ کسی بھی رکن اسمبلی کو ایوان میں بل پیش کرنے سے پہلے اس کی ڈرافٹنگ جانچ لی جائے، زبان میں کسی طرح کی غلطی نہ ہو، اس پر خصوصی توجہ دینے کی ہدایت بھی دی گئی ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔