شدید بارش سے کئی شہروں کا حال بے حال، دہلی اور ممبئی میں آبی جماؤ اور ٹریفک جام سے لوگ پریشان

 ملک بھر میں مانسون پوری طرح سرگرم ہو چکا ہے۔ شمال سے لے کر جنوب اور مشرق سے لے کر مغرب تک ہو رہی بارش سے موسم سہانا ہو گیا ہے جس سے لوگوں کو شدید گرمی سے راحت ملی ہے۔ گزشتہ 24 گھنٹوں میں بھی کئی ریاستوں میں جھماجھم بارش درج کی گئی ہے۔ خاص طور پر ممبئی، دہلی، اتر پردیش، اوڈیشہ، کرناٹک اور کیرالہ میں شدید بارش سے زندگی متاثر ہوئی ہے۔

قومی راجدھانی دہلی اور این سی آر کے علاقوں میں جمعہ کی رات سے مسلسل بارش ہو رہی ہے۔ اس سے کئی علاقوں میں آبی جماؤ کی حالت بن گئی ہے۔ سڑکوں پر پانی بھرنے سے ٹریفک متاثر ہوئی ہے اور کچھ جگہوں پر گھروں میں بھی پانی داخل ہو گیا ہے۔ محکمہ موسمیات کے مطابق دہلی میں آج بھی بارش جاری رہ سکتی ہے اور آئندہ ہفتہ تک موسم ایسا ہی بنا رہنے کا امکان ہے۔

وہیں ممبئی میں جمعرات سے ہو رہی موسلادھار بارش کی وجہ سے کئی علاقوں میں پانی بھر گیا ہے جس سے ٹریفک جام کا مسئلہ پیدا ہو گیا ہے۔ آمد و رفت میں لوگوں کو کافی پریشانی کا سامنا کرنا پڑ رہا ہے۔ مقامی انتظامیہ نے لوگوں سے زیادہ ضروری نہ ہونے پر گھر سے باہر نہیں نکلنے کی اپیل کی ہے۔ میونسپل کارپوریشن اور ہنگامی خدمات الرٹ پر ہیں۔ ٹرینوں کی آمد و رفت بھی متاثر ہوئی ہے اور حد نظر کم ہونے کی وجہ سے اڑانوں پر بھی اثر پڑا ہے۔ محکمہ موسمیات نے ہفتہ کے لیے بھی آرینج الرٹ جاری کیا ہے۔

گزشتہ 24 گھنٹوں میں ساحلی کرناٹک، کیرالہ اور ودربھ میں شدید بارش دیکھنے کو ملی ہے۔ اس کے علاوہ اوڈیشہ، جھارکھنڈ، چھتیس گڑھ، مدھیہ پردیش اور گنگا کے علاقے والے مغربی بنگال میں درمیانی سے بھاری بارش درج کی گئی۔ آنے والے 24 گھنٹوں میں بہار، پنجاب، راجستھان، جموں و کشمیر اور لداخ میں ہلکی بارش ہونے کا امکان ہے۔

بارش کی وجہ سے آبی جماؤ اور سیلاب جیسی حالت بن سکتی ہے۔ انتظامیہ نے لوگوں سے مستعد رہنے اور ضروری احتیاط برتنے کی اپیل کی ہے۔ محکمہ موسمیات کی وارننگ کے مطابق شدید بارش کا یہ دور ابھی کچھ دن اور جاری رہ سکتا ہے۔