جموں میں شدید بارش سے لینڈ سلائڈنگ اور بادل پھٹنے کا خطرہ، الرٹ جاری

جموں شہر میں گزشتہ 24 گھنٹوں کے دوران 190.4 ملی میٹر بارش درج کی گئی، بسنتر نالہ خطرے کے نشان سے اوپر ہے۔ افسران نے اس پر تشویش کا اظہار کرتے ہوئے سانبہ میں سیلاب کی وارننگ جاری کی ہے۔ اتوار (24 اگست) کی صبح شدید بارش کی وجہ سے بسنتر نالے کے پانی کی سطح میں اچانک اضافے کے بعد افسران نے سانبہ ضلع کے مختلف حصوں میں سیلاب کی وارننگ جاری کر دی ہے۔

افسران نے بتایا کہ صبح 8 بجے نالے کے پانی کی سطح 6 فٹ تک پہنچ گیا، جو نکاسی کے نشان کو عبور کر گئی۔ نالے کے لیے مقرر کردہ وارننگ لیول 4 فٹ ہے، جبکہ خطرے کی سطح 4.5 فٹ اور نکاسی کی سطح 6 فٹ مقرر کی گئی ہے۔ نشیبی علاقوں اور ندی کے کنارے رہنے والے لوگوں کو پانی کے پاس نہ جانے کی وارننگ دی گئی ہے۔ انتظامیہ نے شہریوں کو محتاط رہنے اور کسی بھی ناخواشگوار واقعہ سے بچنے کے لیے حفاظتی ہدایات پر عمل کرنے کا مشورہ دیا ہے۔

علاقہ میں ہو رہی مسلسل بارش نے تشویش میں اضافہ کر دیا ہے اور ضلعی افسران صورتحال پر کڑی نظر رکھ رہے ہیں۔ پانی کی سطح مزید بڑھنے کی صورت میں راحت اور ریسکیو ٹیموں کو تیار رکھا گیا ہے۔ اسی درمیان جموں-کشمیر ڈیزاسٹر مینجمنٹ اتھارٹی نے کہا ہے کہ اگلے 48 گھنٹوں میں مرکز کے زیر انتظام علاقے کے اننت ناگ، کولگام، ڈوڈا، جموں، کٹھوعہ، سانبہ، کشتواڑ، ریاسی، رامبن، راجوری، پونچھ اور اودھم پور اضلاع میں کئی جگہوں پر شدید بارش کا امکان ہے۔ ایک بیان میں کہا گیا ہے کہ ’’جموں ڈویژن میں بادل پھٹنے/سیلاب/لینڈ سلائیڈنگ کا امکان ہے، الرٹ رہیں۔ ایمرجنسی کی صورت میں 112 ڈائل کریں۔‘‘

محکمہ موسمیات نے کہا ہے کہ 26 اگست تک جموں، ریاسی، سانبہ، کٹھوعہ، اودھم پور اور راجوری اضلاع میں بیشتر مقامات پر ہلکی سے درمیانی بارش اور کچھ مقامات پر شدید بارش کا امکان ہے۔ ساتھ ہی محکمہ موسمیات نے لوگوں کو ندی کے کناروں اور کچے ڈھانچوں سے دور رہنے کا مشورہ دیا ہے۔