ہماچل پردیش میں شدید بارش اور آندھی طوفان کا الرٹ، کئی سڑکیں بند، آمد و رفت متاثر

ہماچل پردیش میں مسلسل ہو رہی بارش سے عام زندگی بُری طرح متاثر ہوئی ہے۔ سڑکیں بند ہو گئی ہیں اور آمد و رفت میں رکاوٹ پڑی ہے۔ محکمہ موسمیات نے ریاست کے سبھی لوگوں کے لیے وارننگ جاری کی ہے کہ گھروں میں ہی رہیں بغیر ضروری کام کے باہر نہ نکلیں۔ آئی ایم ڈی کے تازہ الرٹ کے مطابق اگلے دو دن تک ہماچل کے کئی حصوں میں آندھی-طوفان، تیز ہوائیں اور ہلکی سے تیز بارش کا امکان ہے۔

ہماچل کی راجدھانی شملہ میں گزشتہ 24 گھنٹے سے مسلسل بارش جاری ہے۔ یہ صورتحال اگلے کچھ دنوں تک بنی رہ سکتی ہے۔ وہیں کانگڑا، اونا، سرمور وغیرہ ضلعوں میں بھی 12 اگست تک شدید بارش کا امکان ظاہر کیا گیا ہے۔

ہماچل پردیش کے لیے اس مرتبہ مانسون آفت بن کر آیا ہے۔ مانسون کی شروعات سے شدید بارش اور فلیش فلڈ کے واقعات سامنے آ رہے ہیں۔ ایک بار پھر سے منڈی ضلع کے پنارسا گاؤں کے چُبھلو اور راہڑی نالے میں اچانک سے تباہ کن سیلاب آ گیا ہے۔

ایسے میں پرانسا کی پہاڑیوں پر فلیش فلڈ کا خدشہ ظاہر کیا جا رہا ہے۔ وہیں منڈی پنڈوہ راستے میں شدید بارش کی وجہ سے 9 میل سڑک پر ملبہ آ گیا جس کی وجہ سے گاڑی ملبے میں پھنس گئی ہے۔ کافی دیر بعد گاڑی کو ملبے سے باہر نکالا گیا۔ ملبے سے باہر نکالنے کے لیے مقامی نوجوان مہیش نے کافی کوششیں کیں، جس سے لوگوں کی جان کی حفاظت ہو سکی نہیں تو ان کو بچانا مشکل ہو جاتا۔

واضح رہے کہ منڈی ضلع کے اوٹ تھانہ حلقہ کے تحت آنے والے پنارسا گاؤں کے دو نالوں میں شدید سیلاب کی وجہ سے پورا علاقہ پانی سے بھر گیا۔ راحت کی خبر ہے کہ ابھی تک کسی بھی طرح کے بڑے نقصان کی کوئی اطلاع نہیں ہے۔ لیکن علاقے میں مسلسل ہو رہی بارش کی وجہ سے لوگ خوفزدہ ہیں۔