دہلی این سی آر میں جھما جھم بارش، جمنا کا پانی گھروں اور کھیتوں میں داخل، سیلاب کا خدشہ، الرٹ جاری

دہلی-این سی آر میں جھما جھم بارش کے باعث ایک طرف جہاں لوگوں کو شدید گرمی اور گھٹن سے وقتی راحت ملی ہے، وہیں دوسری جانب بڑھتے ہوئے پانی نے خطرے کی گھنٹی بجا دی ہے۔ جمنا کا پانی دوبارہ تیزی سے بڑھنے لگا ہے، جس کی وجہ سے نشیبی علاقوں میں حالات خراب ہوتے جا رہے ہیں۔ ہر طرف پانی بھرنے سے کھیت اور فارم ہاؤسز ڈوبنے لگے ہیں اور مقامی باشندوں کو اپنے گھروں سے نکل کر محفوظ مقامات کی طرف جانا پڑ رہا ہے۔

مسلسل بارش کے ساتھ ساتھ ہریانہ کے ہتھنی کنڈ بیراج سے چھوڑے گئے پانی نے بھی جمنا کے پانی کی سطح کو خطرناک حد تک بڑھا دیا ہے۔ کئی خاندان اب سڑکوں پر ٹینٹ اور عارضی جھونپڑیاں بنا کر رہنے پر مجبور ہیں۔ یہ اس ماہ میں دوسرا موقع ہے جب جمنا کا پانی خطرے کے نشان سے اوپر چلا گیا ہے۔ اس سے پہلے بھی تیز بارش اور بیراج سے پانی چھوڑنے کی وجہ سے دہلی اور نواحی علاقوں میں سیلاب جیسی صورت حال پیدا ہو گئی تھی۔

مقامی انتظامیہ نے الرٹ جاری کر دیا ہے اور تٹ بندی کے قریب رہنے والوں سے اپیل کی ہے کہ وہ فوری طور پر محفوظ مقامات پر منتقل ہو جائیں۔ دہلی کے مختلف علاقوں، خاص طور پر سنگم وہار اور نیم چوک روڈ پر شدید پانی بھرنے کی ویڈیوز سامنے آئی ہیں، جن میں سڑکیں تالاب میں بدلتی دکھائی دے رہی ہیں۔

بھارتی محکمہ موسمیات (آئی ایم ڈی) نے اپنے تازہ ترین بلیٹن میں بتایا ہے کہ 29 اگست سے 3 ستمبر تک دہلی این سی آر اور اطراف کے علاقوں میں مسلسل وقفے وقفے سے بارش کا سلسلہ جاری رہنے کا امکان ہے۔ 29 اور 30 اگست کو گرج چمک کے ساتھ تیز بارش، 31 اگست اور یکم ستمبر کو درمیانی درجے کی بارش جبکہ 2 اور 3 ستمبر کو دوبارہ گرج چمک کے ساتھ موسلادھار بارش کا امکان ظاہر کیا گیا ہے۔

مسلسل بارش اور بڑھتے پانی کے باعث کسانوں کی کھڑی فصلیں تباہ ہونے کے دہانے پر ہیں جبکہ مویشیوں کو بھی محفوظ مقامات پر لے جانے کی کوشش کی جا رہی ہے۔ جمنا کنارے رہنے والے افراد میں خوف و ہراس کا ماحول ہے۔ ان کا کہنا ہے کہ اگرچہ انتظامیہ نے کئی مقامات پر ریلیف کیمپ قائم کیے ہیں لیکن بارش اور بڑھتے پانی کی وجہ سے مسائل میں کمی کے بجائے مزید اضافہ ہو رہا ہے۔

ماہرین کا کہنا ہے کہ اگر اگلے چند دنوں میں بارش کا سلسلہ جاری رہا تو دہلی این سی آر میں سیلابی صورت حال مزید سنگین ہو سکتی ہے۔ ایسی صورت میں نہ صرف عام زندگی بری طرح متاثر ہوگی بلکہ زرعی نقصان بھی بڑا ہوگا۔ مقامی شہریوں نے حکومت اور انتظامیہ سے اپیل کی ہے کہ وہ فوری طور پر مستقل حل نکالیں تاکہ ہر سال بارش کے ساتھ پیدا ہونے والے اس بحران سے چھٹکارا مل سکے۔