ملک میں بڑھتا جا رہا گرمی کا قہر، راجدھانی میں مزید 7 دن رہے گا ’لو‘ کا اثر

راجدھانی دہلی سمیت ملک بھر میں گرمی کی شدت لگاتار بڑھتی ہی جا رہی ہے۔ محکمہ موسمیات نے تو راجدھانی میں مزید ایک ہفتہ تک گرم ہوا یعنی ’لو‘ چلنے کا امکان ظاہر کیا ہے۔ 30 مئی کو راجدھانی میں درجہ حرارت دوپہر میں 44 ڈگری سیلسیس کے اوپر درج کیا گیا۔ محکمہ موسمیات کے ایک افسر کا تو یہاں تک کہنا ہے کہ راجدھانی میں کم از کم درجہ حرارت 26.8 ڈگری سیلسیس رہا جب کہ نمی 41 فیصد درج کی گئی۔ افسر نے آج صبح امکان ظاہر کیا تھا کہ’’شہر کے کچھ حصوں میں لو چلنے کے ساتھ ہی درجہ حرارت 44 ڈگری تک پہنچ سکتا ہے۔‘‘ اور ان کا یہ بیان سچ ثابت ہوا جب دوپہر میں 44 ڈگری درجہ حرارت دیکھنے کو ملا۔ 29 مئی کو شہر کا زیادہ سے زیادہ درجہ حرارت 43.1 ڈگری سلسیس اور کم از کم درجہ حرارت 23.6 ڈگری سلسیس درج کیا گیا تھا۔

دوسری طرف اتر پردیش کے پریاگ راج میں تو بدھ کی صبح زبردست تپش دیکھنے کو ملی۔ وہاں زیادہ سے زیادہ درجہ حرارت 47.6 ڈگری تک پہنچ گیا جب کہ منگل کو یہ درجہ حرارت 47.3 تھا۔ مغربی راجستھان کے دور دراز علاقوں میں بھی لو چل رہی ہے۔ ریاست کی سب سے گرم جگہ شری گنگا نگر ہے جہاں کا زیادہ سے زیادہ درجہ حرارت 45.6 ڈگری سلسیس درج کیا گیا۔ چرو میں درجہ حرارت 44.5 ڈگری سلسیس تک رہا۔

بہار میں بھی گرمی کی شدت اپنے عروج پر ہے۔ ریاست کی راجدھانی پٹنہ اور آس پاس کے حصوں میں جمعرات کو صبح سے ہی تیز دھوپ نکلی ہوئی ہے۔ ریاست میں زیادہ تر علاقوں میں شدید تپش دیکھنے کو مل رہی ہے۔ محکمہ موسمیات نے پیشین گوئی میں بتایا ہے کہ ایک دو دنوں تک سورج کی گرمی برقرار رہنے کے آثار ہیں۔ زیادہ تر علاقوں میں زیادہ سے زیادہ درجہ حرارت 45 ڈگری کے آس پاس درج کیا گیا۔ پٹنہ میں گرمی کی شدت کا اندازہ اسی بات سے لگایا جا سکتا ہے کہ وہاں کم از کم درجہ حرارت 27.0 ڈگری سلسیس درج کیا گیا۔

بہار کے ساتھ اچھی بات یہ ہے کہ محکمہ موسمیات نے ایک دو دنوں میں بارش کی امید ظاہر کی ہے۔ساتھ ہی سپول اور ارریہ وغیرہ میں ہلکی بارش ہونے کا بھی امکان ظاہر کیا جا رہا ہے۔ محکمہ موسمیات کے مطابق اگلے 24 گھنٹے کے دوران کچھ اضلاع میں بارش کی صورت حال بن سکتی ہے، لیکن زیادہ تر علاقوں میں سورج کی تپش برقرار رہے گی اور لو کی زد میں ریاست کے کئی علاقے رہیں گے۔

مدھیہ پردیش میں گرمی کی شدت سے کچھ راحت ملی ہے۔ بھوپال سمیت ریاست کے دیگر حصوں میں جمعرات کو ہلکے بادلوں کی موجودگی سے گرمی کم ہوئی۔ ریاست میں جمعرات کی صبح آسمان پر چھائے ہلکے بادلوں کی موجودگی گرمی سے راحت دے رہی ہے۔ ساتھ ہی گرم ہواؤں کا اثر کم ہے، جس سے گزشتہ دنوں کے مقابلے جمعرات کو گرمی سے راحت ہے۔