ہریانہ: برودہ اسمبلی سیٹ پر کانگریس کی جیت زرعی قوانین کے خلاف عوام کا فیصلہ

کماری شیلجا نے کہا کہ برودہ ضمنی انتخابات میں کانگریس امیدوار کو اکثریت دے کر عوام نے دکھا دیا کہ انہیں تانا شاہی فیصلے منظور نہیں ہیں اور نہ ہی حکومت کا طریقہ کار عوامی مفاد میں نظر آرہا ہے۔

تصویر سوشل میڈیا
تصویر سوشل میڈیا
user

یو این آئی

چندی گڑھ: ہریانہ کانگریس کی صدر کماری شیلجا نے برودہ اسمبلی ضمنی انتخابات میں کانگریس کی کامیابی کو ریاست کے عوام کی جیت بتاتے ہوئے کہا کہ یہ کسانوں کے خلاف بنائے گئے قوانین کے خلاف عوام کا فیصلہ ہے۔ انہوں نے کہا کہ انتخابات جیتنے کے تمام نامناسب ہتھکنڈے آزمانے کے باوجود حکمراں اتحاد کو یہاں شکست سے دوچار ہونا پڑا اور یہ واضح پیغام ہے کہ عوام نے انہیں مسترد کر دیا ہے۔ کماری شیلجا آج برودہ میں کانگریس امیدوار اندو راج نروال کی جیت کے بعد دہلی واقع اہنی رہائش گاہ پر صحافیوں سے با ت چیت کر رہی تھیں۔

انہوں نے کہا کہ برودہ ضمنی انتخابات میں کانگریس امیدوار کو اکثریت دے کر برودہ کے عوام نے دکھا دیا کہ انہیں نہ تو مرکز کی مودی حکومت کے تانا شاہی فیصلے منظور ہیں اور نہ ہی ریاست میں بی جے پی-جے جے پی حکومت کا طریقہ کار عوامی مفاد میں نظر آرہا ہے۔ اس الیکشن کا نتیجہ براہ راست مرکز کے سیاہ کسان قوانین کے خلاف ہریانہ کے عوام کا فیصلہ ہے اور عوام نے واضح پیغام دے دیا ہے کہ کالے قوانین کی پیروی کرنے والی ہریانہ کی بی جے پی-جے جے پی حکومت کی الٹی گنتی شروع ہوچکی ہے۔


انہوں نے کہا کہ کانگریس ہمیشہ کسانوں کے مفاد کی بات کرتی رہی ہے اور ان کی فصلوں کی سہارا قیمت کے حق کے لیے مسلسل جدوجہد کر رہی ہے۔ بدھ 11 نومبر کو بھی کانگریس کسانوں کے حق کے لیے پانی پت میں ایک ٹریکٹر ریلی کا انعقاد کرے گی، جس کی قیادت ریاست کے کانگریس انچارج وویک بنسل کریں گے۔

کماری شیلجا نے دہرایا کہ جب تک یہ کسان مخالف مرکز اور ہریانہ کی حکومتیں کالے قوانین میں تبدیلی نہیں کرتیں، تب تک کانگریس کی جدوجہد جاری رہے گی اور برودہ ضمنی انتخابات میں عوام نے دکھادیا کہ کانگریس کے اس جدوجہد کو ہریانہ کے عوام کی حمایت اب حاصل ہوچکی ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔