جی ایس ٹی اصلاحات: ’ہماری دلیلیں نہیں سنی گئیں، فیصلہ لینے میں کافی تاخیر کر دی گئی‘، چدمبرم نے مرکز کو بنایا نشانہ

56ویں جی ایس ٹی کونسل کی میٹنگ میں حکومت کے ذریعہ کئی اہم فیصلے لیے گئے، جس کے تحت 12 فیصد اور 28 فیصد ٹیکس سلیب کو ختم کر دیا گیا ہے۔ اب صرف دو سلیب 5 فیصد اور 18 فیصد ہی رہیں گے۔ اس معاملے پر وزیر مالیات نرملا سیتارمن نے کہا کہ یہ تبدیلی عام لوگوں، کسانوں، کاروباریوں اور صحت شعبہ کے لیے راحت لے کر آئے گی۔

دراصل کانگریس سمیت اپوزیشن پارٹیاں کئی برسوں جی ایس ٹی سلیب کو لے کر مرکزی حکومت کی شدید تنقید کر رہی تھیں اور اسے عوام مخالف بتاتے ہوئے اس میں اصلاح کی بات کر رہی تھیں۔ اپوزیشن کے دباؤ اور حالات کے پیش نظر آخر کار حکومت کو جی ایس ٹی سلیب کے ڈیزائن میں تبدیلی کرنی پڑی۔

اس سلسلے میں کانگریس رہنما اور راجیہ سبھا ایم پی پی چدمبرم نے اپنا ردعمل ظاہر کیا ہے۔ انہوں نے حکومت کے فیصلے کا استقبال کرتے ہوئے کئی معاملوں میں اس کی سخت تنقید بھی کی۔ چدمبرم نے سوشل میڈیا سائٹ ’ایکس‘ پر لکھا، ’’جی ایس ٹی کو منطقی بنانا اور کئی چیزوں اور خدمات پر شرحوں میں کمی کرنا قابل خیرمقدم ہے لیکن یہ فیصلہ 8 سال کی تاخیر سے لیا گیا ہے۔ یہ موجودہ خاکہ اور ٹیکس سلیب شروع سے ہی نافذ ہونی چاہیے تھی۔ ہم اپوزیشن میں رہتے ہوئے مسلسل انتباہ کر رہے تھے لیکن ہماری دلیلوں پر توجہ نہیں دی گئی۔‘‘

کانگریس رہنما نے یہ بھی سوال اٹھایا کہ یہ اصلاح ابھی کیوں کی گئی۔ انہوں نے اس کے پیچھے سیاسی اور اقتصادی وجوہات کی قیاس آرائی لگائی۔ انہوں نے سوال کرتے ہوئے کہا کہ کیا یہ فیصلہ سست اقتصادی نمو، بڑھتے گھریلو قرض، کم ہوتی بچت، آئندہ بہار اسمبلی انتخاب یا پھر امریکی ٹیرف کے دباؤ میں لیا گیا ہے۔ یہ سبھی وجوہات حکومت کو مجبور کرنے والے ہو سکتے ہیں۔

دوسری طرف ترنمول کانگریس نے بھی اس معاملے کو لے کر مرکزی حکومت پر حملہ بولتے ہوئے فیصلے کو عوام کی جیت قرار دیا ہے۔ ٹی ایم سی نے کہا کہ بیمہ پریمیم پر ٹیکس لگانا ظلم اور عوام مخالف تھا۔ ممتا بنرجی نے شروع سے ہی اس کی مخالفت کی تھی۔ حالانکہ یہ فیصلہ یہ ثابت کرتا ہے کہ بی جے پی حکومت تبھی سنتی ہے جب اس پر دباؤ پڑتا ہے۔ ٹی ایم سی نے انتباہ کیا کہ وہ پارلیمنٹ سے لے کر سڑک تک اس طرح کے عوام مخالف فیصلوں کے خلاف لڑتی رہے گی۔