زمین تنازع میں پھنس سکتے ہیں گریٹ کھلی، تحصیلدار نے کہا ’مشہور شخصیات قانون سے بالاتر نہیں‘

سرمور ضلع کے پاونٹا صاحب میں گزشتہ کئی دنوں سے چل رہا زمین تنازعہ آج ایک نئے موڑ پر پہنچ گیا۔ گریٹ کھلّی عرف دلیپ رانا نے تحصیلداراور محکمہ پر سنگین الزامات لگائے تھے لیکن اب علاقائی تحصیلدار نے ثبوت اور دستاویزات کے ساتھ پورے معاملے کا انکشاف کرنے کا دعویٰ کیا ہے۔ ایک پریس کانفرنس میں تحصیلدار رشبھ شرما نے کہا کہ کھلی کے الزامات غلط اور گمراہ کن ہیں۔

’اے بی پی نیوز‘ کی رپورٹ کے مطابق تحصیلدار نے بڑا انکشاف کرتے ہوئے بتایا کہ کھلّی نے بٹامنڈی کے قریب زمین نمبر 8 خریدی تھی لیکن آج وہ زمین نمبر 6 پر قابض ہیں۔ انہوں نے کہا کہ محکمہ نے حدبندی کے لیے کئی بار کھلّی کو طلب کیا لیکن وہ ایک بار بھی پیش نہیں ہوئے۔ اس سے تنازعہ مزید گہرا ہوتا گیا۔

رشبھ شرما نے بتایا کہ کھلی نے گزشتہ 50 دنوں میں محکمہ کو کوئی بھی درست دستاویز پیش نہیں کیا ہے۔ انہوں نے کہا کہ زمین اگر آپ کی ہے تو ثبوت دیجئے، مشہورشخصیت ہونے کی وجہ سے کوئی قانون سے بالاتر نہیں ہوتا۔ انہوں نے کہا کہ محکمہ کی جانب سے مسلسل وقت دیاجاتا رہا لیکن کھلّی کی طرف سے صرف الزامات لگائے، کوئی ثبوت نہیں پیش کیا گیا۔

تحصیلدار نے پریس کانفرنس کے دوران واضح طور پر کہا کہ وہ ایمانداری سے کام کر رہے ہیں اور کسی بھی طرح کے دباؤ کے سامنے نہیں جھکیں گے۔ انہوں نے زور دے کر کہا کہ قانون سب کے لیے برابر ہے، چاہے وہ عام شہری ہوں یا گریٹ کھلّی جیسی مشہور شخصیت۔ معاملے میں قانون کے مطابق کارروائی کی جائے گی۔

تحصیلدار کے اس جوابی حملے کے بعد معاملہ کے ٹھنڈا ہونے کی بجائے مزید گرم ہونے کا خدشہ پیدا ہوگیا ہے۔ ایک طرف کھلّی زمین کو اپنی ملکیت بتا رہے ہیں وہیں محکمہ کا دعویٰ ہے کہ قبضہ غلط جگہ پر ہے۔ اب کارروائی کس طرح آگے بڑھے گی اس کا تعین آنے والے دنوں میں کیا جائے گا۔ اس سے صاف طور پر ظاہر ہورہا ہے کہ معاملہ اب صرف زمین کا نہیں بلکہ قانون بنام مشہور شخصیت کی جنگ بن گیا ہے۔