حکومت نے پہلگام دہشت گردانہ حملے کے سلسلے میں آج کل جماعتی اجلاس طلب کیا

پہلگام میں دہشت گردانہ حملے کے پیش نظر حکومت نےآج یعنی  جمعرات کو کل جما عتی اجلاس بلایا ہے ۔ سرکاری ذرائع نے بتایا کہ وزیر دفاع راج ناتھ سنگھ اس کی صدارت کر سکتے ہیں۔ حکومت کی جانب سے وزیر داخلہ امت شاہ اور وزیر خارجہ ایس جے شنکر آل پارٹی میٹنگ میں بریفنگ دیں گے۔ ذرائع کے مطابق وزیر داخلہ امت شاہ اور راج ناتھ سنگھ اس معاملے پر مختلف پارٹیوں کے لیڈروں سے بات کر رہے ہیں۔ کانگریس سمیت کئی اپوزیشن پارٹیوں نے مطالبہ کیا تھا کہ حکومت اس معاملے پر تمام پارٹیوں کی میٹنگ بلائے۔

راج ناتھ سنگھ سیاحوں کو نشانہ بنانے والے دہشت گردانہ حملے کے بارے میں مختلف جماعتوں کے رہنماؤں کو آگاہ کر سکتے ہیں، جس میں 26 لوگوں کی جانیں گئیں۔ بدھ کی شام، وزیر اعظم نریندر مودی نے عام شہریوں کو نشانہ بنائے جانے والے سب سے بڑے دہشت گردانہ حملے کے تناظر میں سلامتی سے متعلق کابینہ کمیٹی کی میٹنگ کی صدارت کی۔

بدھ کی شام وزیر اعظم نریندر مودی کی صدارت میں کابینہ کمیٹی برائے سلامتی (سی سی ایس) کی ایک اہم میٹنگ ہوئی۔ اس اجلاس میں پاکستان کے خلاف پانچ سخت فیصلے لئے گئے۔ وزیر اعظم مودی کے ساتھ وزیر داخلہ امت شاہ، وزیر دفاع راج ناتھ سنگھ، قومی سلامتی کے مشیر اجیت ڈووال اور وزیر خارجہ ایس جے شنکر بھی موجود تھے۔

میٹنگ کے بعد سکریٹری خارجہ وکرم مستری نے پریس کانفرنس میں ان فیصلوں کی جانکاری دی۔ سب سے بڑا فیصلہ یہ لیا گیا کہ پاک ہندوستانی سرحد پر واقع اٹاری بارڈر چیک پوسٹ کو بند کر دیا جائے گا۔ اس قدم کی وجہ سے دونوں ممالک کے درمیان محدود نقل و حرکت بھی مکمل طور پر رک جائے گی۔

کیبنٹ کمیٹی برائے سیکیورٹی (سی سی ایس) کے اجلاس میں لیا گیا دوسرا بڑا فیصلہ ہندوستان نے پاکستان میں اپنا سفارت خانہ بند کرنے کا فیصلہ کیا ہے۔ اس فیصلے کو پاک ہندوستان سفارتی تعلقات میں ایک اہم موڑ قرار دیا جا رہا ہے۔

تیسرے فیصلے کے تحت بھارت نے سندھ طاس معاہدہ یعنی اندس واٹر ٹریٹی  کومعطل کر دیا ہے جس کی وجہ سے پاکستان کو آبی وسائل کی سطح پر شدید اثرات کا سامنا کرنا پڑ سکتا ہے۔ چوتھے فیصلے کے تحت ہندوستانی حکومت نے ملک میں موجود تمام پاکستانی سفارت کاروں کو 48 گھنٹوں میں ہندوستان چھوڑنے کا حکم دیا ہے۔ پانچواں اور آخری بڑا فیصلہ کیا گیا ہے کہ اب کسی پاکستانی شہری کو ہندوستانی ویزا جاری نہیں کیا جائے گا۔ یہ اقدام دوطرفہ تعلقات میں بے مثال سختی کی عکاسی کرتے ہیں۔