غازی آباد واقع اسکول میں تلک اور کلاوا نہیں ہٹانے والی طالبات کو باہر نکالا گیا، ہندو تنظیموں کا ہنگامہ، پرنسپل ناراض

غازی آباد کے اسکول میں اُس وقت ہنگامہ برپا ہو گیا جب کچھ طالبات کو اس لیے نکال دیا گیا کیونکہ وہ ٹیکا لگا کر اور کلاوا پہن کر آئی تھیں۔ جب انھیں یہ سب ہٹانے کے لیے کہا گیا تو طالبات نے انکار کر دیا۔ جب ان طالبات کو اسکول سے نکال دیا گیا اور یہ خبر ہندو تنظیموں تک پہنچی تو وہ ہنگامہ کرتے ہوئے کالج تک پہنچ گئے۔

بتایا جاتا ہے کہ معاملہ غازی آباد کمشنری کے وجئے نگر علاقہ کے ایک انٹر کالج کا ہے۔ وہاں کچھ طالبات کو اسکول کی ٹیچرس نے تلک اور کلاوا نہ ہٹانے پر اسکول سے باہر نکال دیا۔ واقعہ گزشتہ ہفتہ منگل کا ہے۔ ’راجکیہ کنیا انٹر کالج‘ میں اُس دن کچھ طالبات پیشانی پر ٹیکہ لگا کر اور ہاتھوں میں کلاوا باندھ کر آئی تھیں۔ اسی عمل نے تنازعہ پیدا کر دیا۔

موصولہ اطلاع کے مطابق پیشانی پر تلک لگانے کی وجہ سے کچھ طالبات کو اسکول سے باہر نکال دیا گیا تھا۔ اس کی جانکاری جب ہندو تنظیموں کو لگی تو انھوں نے اسکول میں بھیڑ جمع کر دیا اور ہنگامہ شروع ہو گیا۔ جب طالبات کے گھر والوں کو اس واقعہ کی اطلاع ملی تو وہ بھی کالج پہنچ گئے۔ سبھی اسکول کی ٹیچرس سے بحث کرنے لگے اور طالبات کے ساتھ ہوئی کارروائی کے خلاف آواز اٹھانے لگے۔

یہ ہنگامہ بدھ کے روز پیش آیا۔ اسکول کے اندر حالات زیادہ بگڑتے، اس سے پہلے ہی پولیس پہنچ گئے۔ پھر پولیس نے کالج میں موجود بھیڑ کو کسی طرح سمجھا کر خاموش کرایا اور واقعہ کی تحقیقات کا بھروسہ بھی دلایا۔ اس تنازعہ کے تعلق سے اسکول پرنسپل ڈاکٹر وبھا چوہان نے بتایا کہ انھیں اس کی جانکاری پہلے سے نہیں تھی۔ ساتھ ہی انھوں نے کہا کہ اگر کسی کو کوئی دقت ہے تو پہلے اسکول انتظامیہ سے بات کرنی چاہیے تھی۔ اس طرح بھیڑ جمع کر کے ہنگامہ کرنا کسی بھی طرح مناسب نہیں۔

وبھا چوہان کا کہنا ہے کہ اگر کالج انتظامیہ سے شکایت کی جاتی اور پھر بھی کوئی کارروائی نہیں ہوتی تو پھر آگے قدم بڑھایا جا سکتا تھا۔ چونکہ اسکول میں طالبات پڑھتی ہیں، اس لیے اچانک یہاں پر آ کر ماحول بگاڑنا کسی بھی طرح مناسب نہیں۔ انھوں نے یہ بھی کہا کہ اسکول میں سیاسی مظاہرہ کو قطعاً برداشت نہیں کیا جا سکتا۔ بہرحال، پولیس اس پورے معاملے کی تحقیقات کر رہی ہے۔ پولیس کا کہنا ہے کہ جانچ کے بعد جو بھی قصوروار پایا جائے گا، اس کے خلاف کارروائی کی جائے گی۔