گوری لنکیش قتل: سی سی ٹی وی میں اہم سراغ موجود

بنگلورو: حق کی آواز بلند کرنے والی معروف صحافی گوری لنکیش قتل معاملے میں پولس نے اپنی تفتیش شروع کر دی ہے اور اس معاملے کی جانچ کے لئے کرناٹک حکومت نے فوری کارروائی کرتے ہوئے ایس آئی ٹی بھی تشکیل دے دی ہے۔ اس سلسلے میں پولس کا کہنا ہے کہ سی سی ٹی وی کا بغور جائزہ لیا گیا ہے جس میں کچھ اہم سراغ موجود ہیں۔ پولس کے مطابق جو کچھ سی سی ٹی وی میں نظر آ رہا ہے اس سے پتہ چلتا ہے کہ گوری لنکیش کے قتل سے پہلے ’ریکی‘ کی گئی تھی ۔ ذرائع کا کہنا ہے کہ سی سی ٹی وی فوٹیج میں قاتلوں کے چہرے بھی نظر آئے ہیں اور اندیشہ ظاہر کیا جا رہا ہے کہ اس قتل کے لیے کرائے کے شوٹر کا استعمال کیا گیا ہے۔ پولس سندیپ اور ملیارجن نام کے دو اشخاص سے پوچھ تاچھ بھی کر رہی ہے جنھوں نے گوری لنکیش کے خلاف فیس بک پر گزشتہ دنوں کچھ پوسٹ کیا تھا۔ بہر حال قاتلوں کی تلاش کے لیے پولس محکمہ نے سرگرمی کا مظاہرہ کرتے ہوئے تین ٹیمیں تشکیل دی ہیں تاکہ اس قتل کی تفتیش ہر زاویہ سے کی جا سکے۔

کانگریس صدر سونیا گاندھی اور نائب صدر راہل گاندھی سے بات کرنے کے بعد کرناٹک کے وزیر اعلیٰ سدھارمیا متحرک نظر آئے اور انہوں نے صحافیوں کوحکومت کے ذریعہ اٹھائے گئے اقدامات کے بارے میں بتایا۔ انھوں نے کہا کہ پولس کی تین ٹیمیں اپنی سطح پر جانچ میں لگی ہوئی ہیں اور اس کے علاوہ آئی جی سطح کے افسر کی قیادت میں ایس آئی ٹی کی تشکیل بھی عمل میں آ چکی ہے۔ سدھارمیا نے گوری لنکیش قتل کیس کو کلبرگی کے قتل سے جوڑتے ہوئے یہ بھی کہا کہ دونوں واردتوں میں ایک جیسے اسلحے کا استعمال کیا گیا ہے اور تفتیش کے دوران ایس آئی ٹی اور پولس ٹیم اس بات کو مدنظر رکھتے ہوئے آگے بڑھ رہی ہے۔

قابل ذکر ہے کہ کل شام بنگلورو کی سینئر صحافی گوری لنکیش کا بنگلورو واقع ان کے گھر پر گولی مار کر قتل کر دیا گیا تھا۔ پولس کے مطابق لنکیش کار سے اتر کر گھر کا دروازہ کھول رہی تھیں کہ تبھی انھیں موٹر سائیکل سوار لوگوں نے گولی مار دی۔ پولس کا کہنا ہے کہ بائیک سواروں نے نزدیک سے لنکیش کو سات گولیاں ماریں۔ حالانکہ بنگلورو پولس نے ابھی تک حملہ آوروں کی کوئی تعداد نہیں بتائی ہے لیکن پڑوسیوں نے امکان ظاہر کیا ہے کہ 3 حملہ آور ہوں گے۔ عین شاہدین کے مطابق لنکیش کی پیشانی پر تین گولیاں داغی گئیں جو ان کی جائے حادثہ پر موت کا اصل سبب بنی۔