100 کروڑ روپے میں گورنر-راجیہ سبھا سیٹ کا لالچ دینے والے گروہ کا پردہ فاش

مرکزی جانچ بیورو (سی بی آئی) نے راجیہ سبھا سیٹ اور گورنر عہدہ دلانے کے جھوٹے وعدے کرنے والے گروہ کا پردہ فاش کر دیا ہے۔ مبینہ طور پر 100 کروڑ روپے میں گورنر-راجیہ سبھا سیٹ عہدہ کا لالچ دینے کی کوشش کرنے والے بین ریاستی گروہ کے چار اراکین کو گرفتار کیا گیا ہے۔ سی بی آئی افسران نے بتایا کہ ایجنسی نے اس معاملے میں حال ہی میں کئی جگہوں پر چھاپہ ماری کی تھی اور اس دوران چار گرفتاری عمل میں آئی ہے۔

سی بی آئی افسران کا کہنا ہے کہ تلاشی مہم کے دوران ایک ملزم سی بی آئی افسر پر حملہ کر کے فرار ہونے میں کامیاب ہو گیا۔ انھوں نے بتایا کہ فرار ملزم کے خلاف جانچ ایجنسی کے افسران پر حملہ کرنے کے الزام میں مقامی پولیس تھانے میں ایک علیحدہ ایف آئی آر درج کی گئی ہے۔ افسران کے مطابق ایف آئی آر میں سی بی آئی نے مہاراشٹر کے لاتور ضلع کے رہنے والے کملاکر پریم کمار بندگر، کرناٹک کے بیلگام باشندہ رویندر وٹھل نائک اور دہلی-این سی آر کے رہنے والے مہندر پال اروڑا، ابھشیک بورا و محمد اعزاز خان کو نامزد کیا ہے۔

ایف آئی آر میں الزام عائد کیا گیا ہے کہ بندگر خود کو ایک سینئر سی بی آئی افسر کی شکل میں پیش کرتا تھا اور اعلیٰ عہدے پر فائز افسران کے ساتھ اپنے تعلقات کا حوالہ دیتے ہوئے بورا، اروڑا، خان اور نائک سے کوئی بھی ایسا کام لانے کو کہتا تھا جسے وہ بھاری بھرکم رقم کے عوض میں پورا کروا سکتا ہے۔ ایف آئی آر کے مطابق ملزمین نے راجیہ سبھا کی سیٹ دلوانے، گورنر کی شکل میں تقرری کروانے اور مرکزی حکومت کی وزارتوں اور محکموں کے ماتحت آنے والے مختلف سرکاری اداروں کا سربراہ بنوانے کی جھوٹی یقین دہانی دے کر عام لوگوں سے بھاری بھرکم رقم اینٹھنے کے غلط ارادے سے سازش تیار کی۔