’فریکونٹ فلائر‘ وزیر اعظم وطن واپس، اب منی پور اور بنیادی ڈھانچے پر توجہ دیں: جے رام رمیش

نئی دہلی: کانگریس پارٹی نے وزیر اعظم نریندر مودی کے حالیہ غیر ملکی دورے کے بعد ان پر طنز کرتے ہوئے کہا ہے کہ اب جب وہ وطن واپس آ چکے ہیں، تو انہیں منی پور، پہلگام اور اپنے آبائی ریاست گجرات سمیت دیگر داخلی مسائل پر سنجیدگی سے توجہ دینی چاہیے۔

وزیر اعظم مودی نے حال ہی میں پانچ ممالک، گھانا، ترنیداد و ٹوباگو، ارجنٹینا، برازیل اور نمیبیا کا دورہ مکمل کیا، جس کے دوران وہ برازیل کے شہر ریو ڈی جنیریو میں 17ویں برکس سربراہی اجلاس میں بھی شریک ہوئے۔

کانگریس کے سینئر لیڈر اور جنرل سکریٹری جے رام رمیش نے سوشل میڈیا پلیٹ فارم ‘ایکس’ پر ایک طنزیہ پوسٹ میں لکھا، ’’ہندوستان اپنے 'سپر پریمیم فریکونٹ فلائر' (انتہائی اعلیٰ درجے کا بار بار غیر ملکی سفر کرنے والے) وزیر اعظم کا خیرمقدم کرتا ہے، جو شاید اگلی غیر ملکی پرواز سے پہلے تین ہفتے ملک میں قیام کریں گے۔‘‘

انہوں نے مزید کہا کہ اب جب وہ ملک میں موجود ہیں، تو انہیں منی پور جانے کا وقت نکال لینا چاہیے، جہاں لوگ گزشتہ دو برس سے ان کے دورے کے منتظر ہیں۔ ساتھ ہی انہیں پہلگام میں حالیہ دہشت گردانہ حملے کی جانچ بھی کرنی چاہیے، جن کے مجرم ابھی تک قانون کے شکنجے میں نہیں آئے۔

کانگریس رہنما نے کہا کہ وزیر اعظم کو اپنی آبائی ریاست گجرات میں بگڑتے بنیادی ڈھانچے اور بار بار پیش آنے والے پل حادثات پر بھی توجہ دینی چاہیے۔ اس کے علاوہ، وہ اگر چاہیں تو سیلاب سے متاثرہ ہماچل پردیش کے لیے فوری امدادی رقم جاری کر سکتے ہیں۔

جے رام رمیش نے کہا کہ مودی حکومت کو جی ایس ٹی میں جامع اصلاحات کی طرف بڑھنا چاہیے، تاکہ عام صارفین کو راحت ملے اور صرف بڑے کارپوریٹ گھرانوں کے بجائے دیگر نجی سرمایہ کاروں کو بھی حوصلہ ملے۔

انہوں نے نشاندہی کی کہ وزیر اعظم کو چاہیے کہ وہ پارلیمنٹ کے 21 جولائی سے شروع ہونے والے مانسون اجلاس کا ایجنڈا طے کرنے کے لیے ایک آل پارٹی میٹنگ کی صدارت بھی کریں۔ یہ عمل جمہوریت کو تقویت دے گا اور حکومت و حزب اختلاف کے درمیان ہم آہنگی پیدا کرے گا۔

کانگریس کا کہنا ہے کہ بین الاقوامی دوروں سے زیادہ اہم ملک کے اندر کے سلگتے مسائل ہیں، جن پر وزیر اعظم کو فوری توجہ دینی چاہیے، تاکہ عوام کا اعتماد بحال ہو۔