یو پی کے سابق وزیر اعلیٰ کلیان سنگھ کورونا پازیٹو، آئی سی یو میں کرایا گیا داخل

کلیان سنگھ کی کورونا رپورٹ پازیٹو آنے کے بعد انھیں یو پی کی راجدھانی لکھنؤ واقع سنجے گاندھی پوسٹ گریجویٹ انسٹی ٹیوٹ آف میڈیکل سائنسز (ایس جی پی جی آئی ایم ایس) میں داخل کروایا گیا ہے۔

تصویر سوشل میڈیا
تصویر سوشل میڈیا
user

تنویر

اتر پردیش کے سابق وزیر اعلیٰ کلیان سنگھ کو جانچ میں کورونا پازیٹو پائے جانے کے بعد اسپتال میں داخل کرایا گیا ہے۔ راجستھان کے گورنر رہ چکے 88 سالہ کلیان سنگھ کو پیر کے روز دیر شام سنجے گاندھی پوسٹ گریجویٹ انسٹی ٹیوٹ آف میڈیکل سائنسز (ایس جی پی جی آئی ایم ایس) میں داخل کرایا گیا۔ انھیں گزشتہ دو دنوں سے بخار، سوکھی کھانسی اور سانس پھولنے کی شکایت تھی۔

ایس جی پی جی آئی ایم ایس کے ڈائریکٹر پروفیسر آر. کے. دھیمان نے کہا کہ کلیان سنگھ کی حالت اس وقت مستحکم ہے۔ انھیں آئی سی یو میں داخل کرایا گیا ہے جہاں ان کی صحت کی نگرانی کی جا رہی ہے۔ غور طلب ہے کہ ملک میں کورونا انفیکشن کی تعداد میں بے تحاشہ اضافہ کا سلسلہ جاری ہے۔ مرکزی وزارت صحت کی جانب سے جاری تازہ اعداد و شمار کے مطابق ملک میں گزشتہ 24 گھنٹے میں کورونا انفیکشن کے 83809 نئے معاملے سامنے آئے ہیں اور 1054 لوگوں کی موت ہو گئی ہے۔

ہندوستان میں کورونا انفیکشن کی تعداد بڑھ کر 49 لاکھ کے پار پہنچ گئی ہے۔ ان میں 9 لاکھ 90 ہزار 61 معاملے سرگرم ہیں۔ علاوہ ازیں 38 لاکھ 59 ہزار 400 لوگوں کو اب تک علاج کے بعد اسپتال سے ڈسچارج کر دیا گیا ہے۔ کورونا کی زد میں آنے سے اب تک 80 ہزار 776 لوگ اپنی جان گنوا چکے ہیں۔

دوسری طرف اگر اتر پردیش کی بات کریں تو یہ ریاست کورونا متاثر ریاستوں میں پانچویں نمبر پر ہے۔ یو پی میں کورونا کے اب تک 3 لاکھ 17 ہزار 195 معاملے سامنے آئے ہیں۔ ریاست میں کورونا کے 67 ہزار 287 معاملے سرگرم ہیں۔ اب تک 2 لاکھ 45 ہزار 417 لوگوں کو علاج کے بعد ڈسچارج کیا جا چکا ہے۔ کورونا کی زد میں آ کر اب تک 4 ہزار 491 لوگوں کی موت ہو چکی ہے۔

Published: 15 Sep 2020, 3:11 PM
next