عصمت دری معاملہ میں قصوروار سابق رکن پارلیمنٹ پرجول ریونّا کو ملی عمر قید کی سزا، 11 لاکھ روپے کا جرمانہ بھی عائد

کرناٹک کی خصوصی عدالت کی طرف سے عصمت دری کے ایک معاملے میں قصوروار قرار دیے گئے سابق رکن پارلیمنٹ پرجول ریونّا کو عمر قید کی سزا سنا دی گئی ہے۔ موصولہ اطلاع کے مطابق خصوصی عدالت کے جج سنتوش گجانن بھٹ نے آج اس سزا کا اعلان کیا۔ عدالت نے 2 معاملوں میں تاحیات قید کے ساتھ دیگر معاملوں میں مجموعی طور پر 11 لاکھ روپے جرمانہ ادا کرنے کا حکم بھی دیا ہے۔ یہ پوری رقم متاثرہ کو معاوضہ کی شکل میں دی جائے گی۔ ساتھ ہی عمر قید کی سزا آج سے ہی اثرانداز ہو گئی ہے۔ جنتا دل سیکولر سے معطل ریونّا کے خلاف عصمت دری سے متعلق 4 معاملے درج کیے گئے تھے۔ متعلقہ معاملہ 48 سالہ خاتون سے جڑا ہے جو ہاسن ضلع مین ریونّا کی فیملی کے گنّیکاڈا فارم ہاؤس میں گھریلو ملازمہ کی شکل میں کام کرتی تھی۔

سابق وزیر اعظم ایچ ڈی دیوگوڑا کا پوتا ریونّا 2021 میں ہاسن کے فارم ہاؤس اور بنگلورو میں اپنے گھر میں خاتون کے ساتھ 2 مرتبہ عصمت دری کا قصوروار پایا گیا ہے۔ اس نے اس عمل کو اپنے موبائل فون میں ریکارڈ بھی کر لیا تھا۔ ساتھ متاثرہ خاتون کو دھمکی دی تھی کہ اگر اس بارے میں کسی کو بتایا تو وہ ویڈیو لیک کر دے گا۔

بہرحال، سرکاری وکیل اشوک نایک نے بتایا کہ فریق استغاثہ نے 26 گواہوں سے بیانات لیے اور 180 دستاویزات جمع کیے۔ کلیدی ثبوت متاثرہ کا تھا، جو بہت ہی قابل اعتبار تھا۔ معاملے کی جانچ کرنے والی خصوصی جانچ ٹیم نے ستمبر 2024 میں 1632 صفحات کا فرد جرم داخل کیا تھا، جس میں 113 گواہوں کے بیانات شامل تھے۔

یہ معاملہ تب سامنے آیا تھا جب ریونّا سے جڑی مبینہ فحش ویڈیوز سامنے آئی تھیں۔ ان ویڈیوز پر مشتمل پین ڈرائیو ہاسن میں 26 اپریل 2024 کو ہونے والے لوک سبھا انتخاب سے عین قبل منظر عام پر آیا تھا، جس کی کچھ ویڈیوز سوشل میڈیا پر بھی وائرل ہوئی تھیں۔ ہنگامہ بڑھنے کے بعد ریونّا کو گزشتہ سال 31 مئی کو جرمنی سے بنگلورو پہنچتے ہی ہوائی اڈہ پر گرفتار کر لیا گیا تھا۔ ہولینرسی پورہ ٹاؤں پولیس اسٹیشن میں درج ایک معاملے سے متعلق ایس آئی ٹی نے یہ گرفتاری کی تھی۔ ریونّا 2024 کے لوک سبھا انتخاب میں ہاسن پارلیمانی حلقہ پر جیت حاصل کرنے میں بھی ناکام رہا تھا۔ اس کے خلاف درج معاملوں کو دیکھتے ہوئے جنتا دل سیکولر نے اسے پارٹی سے معطل کر دیا تھا۔