سابق آئی اے ایس افسر شانت منو جموں و کشمیر کے نئے ریاستی الیکشن کمشنر مقرر

جموں و کشمیر کے لیفٹیننٹ گورنر منوج سنہا نے سابق سینئر آئی اے ایس افسر شانت منو کو مرکز کے زیر انتظام علاقے کا نیا ریاستی الیکشن کمشنر مقرر کیا ہے۔ لوک بھون (گورنرہاؤس) کی جانب سے منگل کو جاری ایک حکم میں کہا گیا ہے کہ جموں و کشمیر پنچایتی راج ایکٹ 1989 کے سیکشن 36 کی ذیلی دفعہ (3) کے ذریعے حاصل اختیارات کا استعمال کرتے ہوئے جموں وکشمیرکے لیفٹیننٹ گورنرنے آئی اے ایس (ریٹائرڈ) شانت منو کو جموں و کشمیر کا ریاستی الیکشن کمشنرمقررکیا ہے۔ وہ 5 سال کی مدت کے لیے یا 70 سال کی عمر تک پہنچنے تک ( جو بھی پہلے ہو) جموں و کشمیر کے ریاستی الیکشن کمشنر کے عہدے پر برقرار رہیں گے۔

لیفٹیننٹ گورنر سنہا کے ذریعہ جاری حکم میں کہا گیا ہے کہ ریاستی الیکشن کمشنر کی تقرری سابق سینئر آئی اے ایس افسر شانت منو کے چارج سنبھالنے کی تاریخ سے مؤثر ہوگی۔ ان کی تقرری کی شرائط و ضوابط کے بارے میں حکومت بعد میں مطلع کرے گی۔ شانت منو 31 دسمبر 2025 کو جموں و کشمیر کے فائنانس کمشنر (ایڈیشنل چیف سکریٹری) کے عہدے سے ریٹائر ہوئے۔ 1984  بیچ کے آئی اے ایس افسر بی آر شرما کو پہلے جموں و کشمیر اسٹیٹ الیکشن کمشنر کے طور پر تعینات کیا گیا تھا اور انہوں نے گزشتہ سال استعفیٰ دے دیا تھا۔

ریاستی الیکشن کمشنر کے طور پر شانت منو کی تقرری سے جموں و کشمیر میں پنچایتی انتخابات کے انعقاد کی راہ ہموار ہوگئی ہے۔ مرکز کے زیرانتظام علاقہ میں منتخب پنچوں اور سرپنچوں کی مدت کار 9 جنوری 2024 کو ختم ہو گئی، اس لیے اب یہ انتخابات اس سال کے آخر میں ہونے کا امکان ہے۔ 2018  کے آخر میں ہونے والے انتخابات کے بعد 4,291 پنچایتوں کے تقریباً 30 ہزار منتخب نمائندوں نے 10 جنوری 2019 کو عہدہ سنبھالا تھا۔ ان کی مدت کار ختم ہونے کے ساتھ ہی پنچایتی اداروں کو تحلیل کر دیا گیا اور پنچایت فنڈز کا انتظام معطل کر دیا گیا۔