اتراکھنڈ اسمبلی کو پہلی مرتبہ ملی خاتون اسپیکر، ریتو کھنڈوری کا نام تاریخ میں رقم

ریتو کھنڈوری کے اسمبلی اسپیکر منتخب ہونے کے بعد وزیر اعلیٰ پشکر سنگھ دھامی نے کہا کہ میں ریاستی اسمبلی کی پہلی خاتون اسپیکر چنے جانے پر انھیں مبارکباد پیش کرتا ہوں۔

ریتو کھنڈوری، تصویر آئی اے این ایس
ریتو کھنڈوری، تصویر آئی اے این ایس
user

قومی آوازبیورو

اتراکھنڈ میں پشکر سنگھ دھامی حکومت تشکیل پا گئی ہے۔ اس کے ساتھ ہی اتراکھنڈ اسمبلی کے لیے اسپیکر کا انتخاب بھی عمل میں آ گیا ہے۔ دلچسپ بات یہ ہے کہ پہلی مرتبہ اتراکھنڈ اسمبلی کو ایک خاتون اسپیکر ملی ہے۔ ریتو کھنڈوری کو پہلی خاتون اسپیکر کے طور پر اتفاق رائے سے منتخب کیا گیا ہے۔ ابھی تک اتراکھنڈ کی سیاست میں اسمبلی اسپیکر کا عہدہ مردوں کو ہی ملتا رہا تھا۔

ریتو کھنڈوری اتراکھنڈ کی کوٹ دوار اسمبلی حلقہ سے منتخب ہوئی ہیں۔ ریتو کھنڈوری ریاست کی پانچویں اسمبلی اسپیکر ہیں جنھوں نے گزشتہ جمعرات کو اسمبلی میں اپنی نامزدگی کا پرچہ داخل کیا تھا۔ نامزدگی کے عمل میں واحد نامزدگی داخل کیے جانے کے سبب ریتو کو بلامقابلہ اسپیکر منتخب کیا گیا۔ انھوں نے بی جے پی کے پریم چند اگروال کی جگہ لی جن کی مدت کار 10 مارچ کو ختم ہو گئی تھی۔


ریتو کھنڈوری کے اسمبلی اسپیکر منتخب ہونے کے بعد وزیر اعلیٰ پشکر سنگھ دھامی نے کہا کہ میں ریاستی اسمبلی کی پہلی خاتون اسپیکر چنے جانے پر انھیں مبارکباد پیش کرتا ہوں۔ وہ اچھی طرح سے ایوان چلائیں گی اور ہماری اسمبلی ان کی قیادت میں نئی تاریخ بنائے گی۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔