شوپیاں میں جنگجوؤں اور فوجی اہلکاروں کے درمیان فائرنگ، ایک فوجی ہلاک

مہلوک فوجی اہلکار کی شناخت 8 جٹ رجمنٹ سے وابستہ سپاہی رنبیر کے طور پر ہوئی ہے۔ وہ فی الوقت 34 آر آر کے ساتھ تعینات تھا۔ اس فائرنگ میں دیپک نامی ایک فوجی زخمی بھی ہوا ہے۔

تصویر سوشل میڈیا
تصویر سوشل میڈیا
user

یو این آئی

سری نگر: جنوبی کشمیر کے ضلع شوپیاں کے پندوشن میں جمعرات اور جمعہ کی درمیانی رات کے دوران جنگجوؤں اور سیکورٹی فورسز کے درمیان فائرنگ کے تبادلے میں ایک فوجی اہلکار جاں بحق جبکہ دوسرا زخمی ہوگیا۔

سرکاری ذرائع نے بتایا کہ شوپیاں کے پندوشن نامی گائوں میں جنگجوئوں کی موجودگی سے متعلق خفیہ اطلاع ملنے پر فوج کی 34 راشٹریہ رائفلز، جموں وکشمیر پولیس کے اسپیشل آپریشن گروپ اور سی آر پی ایف نے مذکورہ علاقہ کو گزشتہ رات محاصرے میں لیکر تلاشی آپریشن شروع کیا۔ انہوں نے بتایا کہ رات کے قریب ڈیڑھ بجے طرفین کے درمیان فائرنگ کا تبادلہ ہوا جس کے نتیجے میں دو فوجی اہلکار زخمی ہوئے جنہیں علاج ومعالجہ کے لئے سری نگر کی بادامی باغ فوجی چھاونی میں واقع 92 بیس ہسپتال لے جایا گیا جہاں ایک فوجی اہلکار زخموں کی تاب نہ لاتے ہوئے دم توڑ گیا۔

مہلوک فوجی اہلکار کی شناخت 8 جٹ رجمنٹ سے وابستہ سپاہی رنبیر کے طور پر ہوئی ہے۔ وہ فی الوقت 34 آر آر کے ساتھ تعینات تھا۔ زخمی فوجی کی شناخت سپاہی دیپک کے طور پر ہوئی ہے۔ دریں اثنا پندوشن میں فورسز نے جنگجو مخالف آپریشن میں خلل ڈالنے والے مقامی لوگوں کے خلاف آنسو گیس کے گولوں اور پیلٹ بندوقوں کا استعمال کیا جس کے نتیجے میں متعدد احتجاجی زخمی ہوئے ہیں۔

ذرائع نے بتایا کہ علاقہ میں فورسز کی تلاشی مہم کے دوران مقامی لوگ بالخصوص نوجوانوں کی ایک بڑی تعداد سڑکوں پر نکل آئی اور فورسز پر پتھرائو کی مرتکب ہوئی۔ فورسز نے ردعمل میں آنسو گیس کے گولے داغے اور چھرے والی بندوقوں کا استعمال کیا۔ فورسز کی جوابی کارروائی میں متعدد احتجاجیوں کے زخمی ہونے کی اطلاعات ہیں جنہیں مختلف ہسپتالوں میں داخل کرایا گیا ہے۔ انتظامیہ نے احتیاط کے طور پر ضلع شوپیاں میں موبائیل انٹرنیٹ خدمات منقطع کرادی ہیں۔ اس کے علاوہ حساس جگہوں پر سیکورٹی فورسز اور ریاستی پولیس کی اضافی نفری تعینات کی گئی ہے۔

دوسری جانب ضلع پلوامہ کے لتر علاقہ میں جمعہ کی صبح جنگجوؤں کی طرف سے فوج کی بکتر بند گاڑی کو دیسی ساختہ بم (آئی ای ڈی) کی مدد سے اڑانے کی کوشش کی گئی۔ دھماکہ کے اس واقعہ میں کوئی اہلکار زخمی نہیں ہوا، تاہم گاڑی کو معمولی نوعیت کا نقصان پہنچا ہے۔