ممبئی واقع ای ڈی دفتر میں آتشزدگی کا واقعہ سنگین معاملہ، اس نے کئی سوالات کھڑے کیے: سپریا سولے

این سی پی لیڈر سپریا سولے نے ممبئی واقع ای ڈی دفتر میں آگ لگنے کے حادثہ پر 28 اپریل کو اپنا رد عمل ظاہر کرتے ہوئے اسے انتہائی سنگین معاملہ قرار دیا۔ ساتھ ہی انھوں نے آگ بجھانے میں فائر بریگیڈ محکمہ کے ذریعہ لگائے گئے وقت پر بھی سوال اٹھایا۔

دراصل اتوار کی علی الصبح جنوبی ممبئی میں اس مرکزی ایجنسی کے دفتر میں زبردست آگ لگ گئی تھی۔ افسران کے مطابق اس حادثہ میں کوئی ہلاک نہیں ہوا ہے۔ دی گئی جانکاری کے مطابق 12 گھنٹے کی سخت مشقت کے بعد آگ پر قابو پایا جا سکا تھا۔ ای ڈی دفتر میں آگ لگنے کی وجہ سے وہاں موجود کئی دستاویزات اور مشینیں جل گئیں۔

اس بارے میں آج جب این سی پی (ایس پی) رکن پارلیمنٹ سپریا سولے سے سوال کیا گیا تو انھوں نے کہا کہ ’’ای ڈی دفتر میں آگ لگنے کا معاملہ انتہائی سنگین ہے۔ اس علاقے میں کوئی بھیڑ بھاڑ بھی نہیں ہوتی ہے۔ جب وہاں کوئی پارکنگ یا بھیڑ نہیں تھی تو فائر بریگیڈ کی گاڑیاں موقع پر کتنے بجے پہنچیں۔ آگ کو تو 15-10 منٹ میں بجھا لیا جانا چاہیے تھا۔‘‘ انھوں نے عمارتوں میں آگ سے حفاظت کی تیاریوں کے بارے میں بھی سوال اٹھائے، اور یہ بھی پوچھا کہ کیا عمارت کا فائر آڈٹ کرایا گیا تھا۔ آگ میں فائلوں کے تباہ ہونے سے متعلق اندیشہ کے بارے میں پوچھے جانے پر انھوں نے کہا کہ ’’کیا ان کے پاس فائلوں کا بیک اَپ ہے؟ اگر کوئی بیک اَپ نہیں ہے تو یہ حیران کرنے والی بات ہے۔‘‘