سری نگر میں آتشزدگی، کئی رہائشی مکان خاکستر

سری نگر: گرمائی دارلحکومت سری نگر کے صفا کدل علاقے میں آگ کی ایک شبانہ واردات میں کئی رہائشی مکان خاکستر ہوگئے اور آگ بجھانے کی کوششوں کے دوران محکمہ فائر اینڈ ایمرجنسی کا ایک افسر بھی زخمی ہوگیا۔ سرکاری ذرائع نے بتایا کہ صفاکدل میں سیکہ ڈافرعلاقے کے گاندر پوہ چوک میں اتوار اور پیر کی درمیانی شب ایک رہائشی مکان سے آگ نمودار ہوئی، جس کے شعلوں نے متصل مکانوں کو اپنی لپیٹ میں لے کر خاکستر کر دیا۔ انہوں نے بتایا کہ محکمہ فائر اینڈ ایمر جنسی کی گاڑیاں اور عملہ آگ بجھانے کے لئے جائے وار دات پر پہنچ گئے اور مقامی لوگوں کی مدد سے آگ کو کافی مشقت کے بعد قابو میں کر لیا۔

مذکورہ ذرائع نے بتایا کہ آگ بجھانے کی کوششوں کے دوران متعلقہ محکمہ کا ایک سب انسپکٹر ایک مکان سے گر کر زخمی ہوگیا۔ مضروب افسر کی شناخت نور عالم خان کے بطور ہوئی ہے جنہیں فوری طور اسپتال منتقل کیا گیا۔ انہوں نے مکان مالکان کی شناخت محمد امین لون، شبیر احمد لون،غلام احمد بٹ، محمد دلاور بٹ، محمد اسلم بٹ اور غلام محمد بٹ کے بطور کی ہے۔

دریں اثنا محکمہ فائر اینڈ ایمر جنسی کے ڈپٹی ڈائریکٹر بشیر احمد نے کہا ہے موسم سرما کے دوران گرمی کے لئے استعمال کیے جانے والے الیکٹرک آلات جیسے روم ہیٹرس وغیرہ آگ لگنے کے زیادہ تر وجوہات ہیں۔ انہوں نے لوگوں سے اپیل کی ہے کہ وہ ان آلات کا ستعمال کرتے وقت احتیاط سے کام لیں۔ بتا دیں کہ سری نگر میں یہ گزشتہ چوبیس گھنٹوں کے دوران رونما ہونے والی آگ کی تیسری واردات ہے۔