اتر پردیش میں نائٹ کرفیو کی مدت میں توسیع، یوپی بورڈ کے امتحانات ملتوی

آبادی کے لحاظ سے ملک کے سب سے بڑے صوبہ اتر پردیش میں کورونا وائرس کے کیسز میں لگاتار ہو رہے اضافہ کے درمیان یوپی کے بڑے شہروں میں نائٹ کرفیو کی مدت میں توسیع کرنے کا فیصلہ کیا گیا ہے

کورونا وائرس / آئی اے این ایس
کورونا وائرس / آئی اے این ایس
user

قومی آوازبیورو

لکھنؤ: آبادی کے لحاظ سے ملک کے سب سے بڑے صوبہ اتر پردیش میں کورونا وائرس کے کیسز میں لگاتار ہو رہے اضافہ کے درمیان یوپی کے بڑے شہروں میں نائٹ کرفیو کی مدت میں توسیع کرنے کا فیصلہ کیا گیا ہے۔ نائٹ کرفیو کا نفاذ اب رات کے 8 بجے سے صبح کے 7 بجے تک رہے گا۔ جن شہروں میں نائٹ کرفیو کی مدت میں توسیع کی گئی ہے ان میں لکھنؤ، الہ آباد، نوئیڈا، غازی آباد، میرٹھ، کانپور اور وارانسی شامل ہیں۔

اس کے علاوہ ریاست میں درجہ اول تا بارہویں تک کی درس و تدریس 15 مئی تک معطل رہیں گی۔ دریں اثنا، یوپی بورڈ کے 10ویں اور 12ویں جماعت کے امتحانات کو بھی ملتوی کر دیا گیا ہے۔ یوپی بورڈ کے امتحانات کی تاریخوں کو آگے بڑھا گیا گیا ہے اور نئی تاریخوں کا اعلان 20 مئی کے بعد کیا جائے گا۔


خیال رہے کہ یوپی بورڈ کے 10ویں اور 12ویں جماعت کے امتحانات آئندہ 8 مئی 2021 سے لئے جانے تھے اور اس میں 56 لاکھ سے زیادہ طلبا بیٹھنے والے تھے۔ بدھ کے روز نائب وزیر اعلیٰ اور محکمہ ثانوی تعلیمی کے امور بھی سنبھالنے والے دنیش شرما نے اشارہ دیا تھا کہ بورڈ امتحانات ملتوی کئے جا سکتے ہیں۔ دراصل امتحانات کرانے والے 19 عہدیداران میں 17 کورونا سے متاثر ہو چکے ہیں اور ان سبھی کا اسپتالوں میں علاج چل رہا ہے۔

خیال رہے کہ یوپی میں کورونا وائرس نے یومیہ کیسز کی تعداد کا نیا ریکارڈ قائم کر دیا ہے۔ گزشتہ روز صوبہ بھر سے 22439 نئے کیسز درج کئے گئے۔ جبکہ اکیلے لکھنؤ میں ہی ایک دن میں 5183 کیسز رپورٹ ہوئے۔

اس سے قبل مدھیہ پردیش، راجستھان، ہماچل پردیش اور مہاراشٹر میں بھی کورونا وائرس کے معاملوں میں اضافہ کے سبب بورڈ کے امتحانات کو ملتوی کر دیا گیا ہے۔ وہیں بدھ کے روز وزیر اعظم نریندر مودی کی سربراہی میں منعقد ہونے والے اجلاس کے دوران سی بی ایس ایس بورڈ کے 10ویں جماعت کے امتحانات کو منسوخ اور 12ویں جماعت کے امتحانات کو ملتوی کر دیا گیا۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


Published: 15 Apr 2021, 2:13 PM