بیٹی کی محبت کی شادی سے ناراض پورے کنبہ نے زہر کھایا، اجتماعی خودکشی کی کوشش میں 2 ہلاک

گجرات کے احمد آباد ضلع میں ایک حیرت انگیز معاملہ سامنے آیا ہے۔ بیٹی کے ذریعہ محبت کی شادی کرنے سے ناراض ایک کنبہ نے زہر کھا کر اجتماعی خودکشی کی کوشش کی۔ اس کوشش میں دو لوگوں کی موت ہو گئی ہے اور باقی کا علاج چل رہا ہے۔ پولیس کے مطابق لڑکی کے والدین اور اس کے دو بھائیوں نے مبینہ طور پر زہر کھا لیا جس میں لڑکی کے والد اور ایک بھائی کی موت ہو گئی ہے۔

میڈیا رپورٹس کے مطابق ڈھولکا تھانہ کے ایک افسر نے بتایا کہ ایک لڑکی نے تقریباً ایک سال قبل دلت طبقہ کے ایک شخص سے لو میرج (محبت کی شادی) کر لی تھی۔ اس سے لڑکی کے والدین اور سبھی بھائی ناخوش تھے۔ انھوں نے مزید بتایا کہ کرن راٹھوڑ (52 سال)، ان کی بیوی نیتابین (50 سال)، بیٹوں ہرش (24 سال) اور ہرشل (19 سال) نے منگل کی شب مبینہ طور پر زہر کھا لیا۔ افسر کا کہنا ہے کہ کرن راٹھوڑ اور اس کے بڑے بیٹے ہرش کی موت ہو گئی ہے، جبکہ بیوی اور چھوٹا بیٹا اسپتال میں زیر علاج ہے۔

پولیس افسر کا کہنا ہے کہ ’’پڑوسیوں نے واقعہ کے بارے میں پتہ چلتے ہی ایمبولنس بلائی اور پولیس کو خبر دی۔ انھیں پرائیویٹ اسپتال لے جایا گیا جہاں ڈاکٹروں نے کَرن اور ان کے بڑے بیٹے کو مردہ قرار دے دیا۔ نیتابین اور ہرشل کا علاج اسپتال میں جاری ہے۔‘‘ انھوں نے بتایا کہ کرن راٹھوڑ کی بیٹی کے سسرال والوں سمیت 18 لوگوں کے خلاف خودکشی کے لیے اکسانے کے الزام میں ایف آئی آر درج کی گئی ہے۔ اس معاملے کی تحقیقات شروع ہو گئی ہے۔