کناڈا کے اسپتال میں آٹھ گھنٹے تک علاج نہ کرنے کی وجہ سے ایک ہندوستانی شہری کی موت، مسک کی تنقید

ارب پتی ایلون مسک نے ایکس پر کنا ڈا کے ہیلتھ کیئر سسٹم پر کڑی تنقید کی۔ مسک کا تبصرہ کناڈا میں ایک 44 سالہ ہندوستانی نژاد شخص کی موت کے بعد سامنے آیا ہے ، جسے مبینہ طور پر علاج کے لیے اسپتال کے ویٹنگ ایریا میں آٹھ گھنٹے سے زیادہ انتظار کرنے پر مجبور کیا گیا تھا۔

کناڈا کے اسپتال میں مرنے والا ہندوستانی نژاد شخص کا نام  پرشانت سری کمار تھا۔ پرشانت کی موت ایڈمنٹن، کینیڈا کے گرے ننس کمیونٹی اسپتال میں دل کا دورہ پڑنے سے ہوئی۔ اس کے اہل خانہ نے بتایا کہ سینے میں شدید درد کی شکایت کے باوجود اسے اسپتال کے انتظار گاہ میں رکھا گیا تھا۔ پرشانت کی اہلیہ نے اسپتال کے رویے کے بارے میں سوشل میڈیا پر ایک ویڈیو شیئر کی، جو تیزی سے وائرل ہوگئی۔ اس ویڈیو میں پرشانت کی بیوی نے الزام لگایا کہ اسپتال کے عملے نے ان کے شوہر کی نازک حالت کو پوری طرح نظر انداز کر دیا۔

اس واقعے پر ردعمل ظاہر کرتے ہوئے ایلون مسک نے سوشل میڈیا پلیٹ فارم ایکس پر ایک پوسٹ شیئر کرتے ہوئے کہا کہ جب حکومت طبی دیکھ بھال سنبھالتی ہے تو یہ امریکن ڈی ایم وی (موٹر وہیکلز کا محکمہ) جیسا ہو جاتا ہے۔ انہوں نے کناڈا کے صحت کی دیکھ بھال کے نظام کا موازنہ امریکی محکمہ برائے موٹر وہیکلز سے کیا، جسے اکثر اپنی نااہلی کی وجہ سے تنقید کا سامنا کرنا پڑتا ہے۔