’حکمراں جماعت کے سامنے الیکشن کمیشن بے بس‘، بہار میں انتخاب کے دوران خواتین کے کھاتوں میں پیسہ ڈالے جانے پر کانگریس کا طنز

بہار اسمبلی انتخاب کے پہلے مرحلہ کی انتخابی مہم آج ختم ہو گئی ہے۔ اب تمام سیاسی پارٹیاں دوسرے مرحلہ کی انتخابی مہم میں مصروف ہو گئی ہیں۔ رواں اسمبلی انتخاب میں حکمراں جماعت اقتدار حاصل کرنے کے لیے کسی بھی حد تک جانے کو تیار نظر آ رہی ہے۔ خواہ للن سنگھ کی دھمکی ہو یا ضابطہ اخلاق نافذ ہونے کے بعد خواتین کے اکاؤنٹ میں پیسے ڈالنے کا معاملہ ہو۔ اپوزیشن پارٹیوں کا الزام ہے کہ ان بے ضابطگیوں کو پس پشت ڈالتے ہوئے الیکشن کمیشن حکمراں جماعت کے ساتھ قدم سے قدم ملا کر کھڑا دکھائی دے رہا ہے۔ کانگریس نے اس تعلق سے بہار کی راجدھانی پٹنہ میں ایک اہم پریس کانفرنس کا انعقاد کیا۔ اس پریس کانفرنس سے راجستھان کے سابق وزیر اعلیٰ و کانگریس کے سینئر رہنما اشوک گہلوت اور پارٹی کے میڈیا اینڈ پبلسٹی ڈپارٹمنٹ کے چیئرمین پوکن کھیڑا نے خطاب کیا۔

پریس کانفرنس سے خطاب کرتے ہوئے بہار کانگریس کے سینئر مبصر اشوک گہلوت نے کہا کہ ’’انتخاب کی تاریخ کے اعلان کے ساتھ ہی ضابطہ اخلاق نافذ ہو جاتا ہے، اس میں کوئی بھی منصوبہ نافذ نہیں ہو سکتا ہے۔ لیکن بہار میں انتخاب کے دوران بھی خواتین کے کھاتے میں پیسے ڈالے جائیں گے۔ یہ سب دیکھنے کے بعد بھی الیکشن کمیشن کارروائی کرنے کی ہمت نہیں کر پا رہا ہے۔ آخر یہ کیا ہو رہا ہے اور سوال یہ ہے کہ کیا یہی جمہوریت ہے؟‘‘ ساتھ ہی انہوں نے کہا کہ ’’نریندر مودی نے اب تک عوام سے جتنے بھی وعدے کیے ہیں ان میں ایک بھی وعدہ اب تک پورا نہیں کیا ہے۔ ان کے اہم وعدوں میں کالا دھن لے کر آئیں گے، 2 کروڑ ملازمت دیں گے، 15 لاکھ کھاتے میں ڈالیں گے، چینی مل شروع کریں گے اور 100 اسمارٹ سٹی بنائیں گے شامل ہیں۔‘‘

اشوک گہلوت کا کہنا ہے کہ ’’بہار میں انتخابی ماحول کو دیکھ کر لگ رہا ہے نتیش کمار جی اقتدار سے جا رہے ہیں اور تیجسوی یادو جی آ رہے ہیں۔‘‘ انھوں نے یہ بھی ظاہر کیا کہ ’’مہاگٹھ بندھن کی حکومت نے بہار میں 25 لاکھ روپے کا مفت ہیلتھ انشورنس فراہم کرنے کا وعدہ کیا ہے۔ یہ منصوبہ بہار کے لوگوں کے لیے بڑی راحت ثابت ہوگی۔ اس لیے میری پورے بہار سے اپیل ہے کہ یہاں مہاگٹھ بندھن کی حکومت بنائیں۔‘‘

کانگریس پارٹی کے میڈیا اینڈ پبلسٹی ڈپارٹمنٹ کے چیئرمین پون کھیڑا نے پریس کانفرنس سے خطاب کرتے ہوئے کہا کہ ’’مودی حکومت کے وزیر للن سنگھ کہہ رہے ہیں اپوزیشن امیدوار کو انتخاب کے روز باہر مت نکلنے دینا۔ اب ان کے خلاف ایف آئی آر ہو گئی ہے، اس معاملہ میں میڈیا کا شکریہ۔ لیکن آج صبح ایک ویڈیو میں بی جے پی لیڈر اور سابق وزیر توانائی آر کے سنگھ کہہ رہے تھے کہ بہار میں 62 ہزار کروڑ روپے کا گھوٹالہ ہوا ہے۔ اس کی سی بی آئی تحقیقات ہونی چاہیے۔‘‘ پون کھیڑا کا یہ بھی کہنا تھا کہ ’’اب یہ ویڈیو میڈیا چینل نے ڈیلیٹ کر دیا ہے۔ یہ بہت بڑا گھوٹالہ ہے، لیکن نریندر مودی خاموش ہیں اور جواب نہیں دے پا رہے ہیں۔‘‘