سبریمالا سونا چوری معاملے میں کیرالہ، تمل ناڈو اور کرناٹک میں 21 مقامات پر ای ڈی کی چھاپہ ماری

ترواننت پورم: انفورسمنٹ ڈائریکٹوریٹ (ای ڈی) نے منگل کو سبریمالا سونے کی چوری معاملے میں مبینہ منی لانڈرنگ کے زاویے کی تحقیقات تیز کر دی ہے۔ اس دوران کیرالہ، تمل ناڈو اور کرناٹک میں 21 مقامات پر بیک وقت چھاپے مارے گئے۔ اس معاملے میں مجموعی طور پراسپیشل انویسٹی گیشن ٹیم (ایس آئی ٹی) نے اب تک 13 لوگوں کو گرفتار کیا ہے۔ تمام گرفتار ملزمین اس وقت عدالتی حراست میں ہیں۔

ای ڈی کی یہ چھاپے ماری ایسے وقت میں ہورہی ہے جب کیرالہ ہائی کورٹ کی نگرانی میں کام کرنے والی ایک خصوصی تفتیشی ٹیم (ایس آئی ٹی) مندر سے سونے کی مبینہ ہیرا پھیری کی متوازی مجرمانہ تحقیقات جاری رکھے ہوئے ہے۔ ای ڈی نے اہم ملزمین کے گھروں کی تلاشی شروع کی جن میں پہلے ملزم انی کرشنن پوٹی، سی پی آئی (ایم) لیڈر مراری بابو، اے پدم کمار اور این واسو شامل ہیں۔ مزید برآں بیلاری کے سونے کے تاجر گووردھن اور چنئی واقع اسمارٹ کریشنز کے سی ای او پنکج بھنڈاری کے ٹھکانوں پر بھی تلاشی لی گئی، جن پر سونے کی پلیٹوں کو پگھلانے اور ٹھکانے لگانے میں مدد کرنے کا الزام ہے۔

ترواننت پورم میں ٹراوانکور دیواسووم بورڈ کے ہیڈکوارٹرمیں بھی تلاشی لی گئی۔ ترواننت پورم کے قریب کلیمانور اور بنگلورو کے شری رام پورا میں انی کرشنن پوٹی کے گھروں، کوٹائم میں مراری بابو کے گھر، پیٹا میں این واسو کے گھر اور ارنمولہ میں اے پدم کمار کے گھر پر بھی چھاپے مارے گئے۔

ای ڈی سے وابستہ ذرائع نے بتایا کہ تانترک کنٹارار راجیو کے گھر پر ابھی تک کوئی تلاشی نہیں لی گئی ہے۔ ای ڈی نے جرم سے حاصل ہوئے پیسوں کی مبینہ منی لانڈرنگ کی جانچ کے لیے پولیس ایف آئی آر کی طرح ایک انفورسمنٹ کیس انفارمیشن رپورٹ (ای سی آئی آر) درج کی ہے۔ تفتیش کار فنڈز کے ذرائع، فنڈز کے لین دین اور اثاثوں کو چھپانے کے امکان کی تحقیقات کر رہے ہیں۔ افسران کا کہنا ہے کہ اگر غیر متناسب اثاثے پائے گئے تو اثاثے ضبط کرنے کی کارروائی کی جا سکتی ہے۔

اس جانچ کی نگرانی ای ڈی کی کوچی یونٹ کے ایڈیشنل ڈائریکٹر راکیش کمار کررہے ہیں۔ دریں اثنا، کیرالہ ہائی کورٹ نے منگل کو خصوصی تحقیقاتی ٹیم (ایس آئی ٹی) کو ہدایت دی کہ وہ سبریمالا مندر کی تحقیقات کرے تاکہ سونے کی مبینہ چوری کے پیچھے سازش اور طریقہ کار کو بے نقاب کیا جا سکے۔ سائنسی نتائج کی بنیاد پر مندر کے اندر اور اردگرد شواہد اکٹھے کیے جا رہے ہیں۔