ای ڈی نے عآپ لیڈر دیپک سنگلا کو کیا گرفتار، بینک فراڈ اور مشکوک رقم کے لین دین کا ہے معاملہ

بینک فراڈ اور منی لانڈرنگ سے منسلک معاملے کو لے کر ای ڈی کی ٹیم نے دہلی اور گوا میں چھاپے ماری کے بعد عام آدمی پارٹی کے لیڈر دیپک سنگلا کو گرفتار کر لیا ہے۔ ای ڈی کے مطابق یہ کارروائی بینک فراڈ اور مشکوک رقم کے لین دین کی تحقیقات کے تحت کی گئی ہے۔ واضح رہے کہ آج صبح سے ہی دہلی اور گوا سمیت تقریباً 7 ٹھکانوں پر ای ڈی کی جانب سے تلاشی مہم چلائی جا رہی تھی۔ یہ کارروائی پریونشن آف منی لانڈرنگ ایکٹ (پی ایم ایل اے) کے تحت کی گئی۔

موصولہ اطلاعات کے مطابق ای ڈی کی یہ کارروائی منی لانڈرنگ اور 100 کروڑ کے بینک فراڈ سے متعلق معاملے میں کی گئی ہے۔ کئی گھنٹوں تک چلی تلاشی اور پوچھ تاچھ کے بعد دیپ سنگلا کو گرفتار کیا گیا۔ ایجنسی نے دہلی اور گوا میں ایک ساتھ چھاپے مار کر دستاویزات، ڈیجیٹل ریکارڈ اور مالی لین دین سے وابستہ اہم شواہد اکٹھے کیے ہیں۔ ای ڈی فی الحال ضبط کیے گئے دستاویزات اور الیکٹرانک آلات کی جانچ کر رہی ہے۔ ایجنسی یہ پتہ لگانے کی کوشش کر رہی ہے کہ مبینہ منی لانڈرنگ اور بینک فراڈ نیٹورک میں اور کون کون سے لوگ شامل ہیں اور رقم کا استعمال کن ذرائع سے کیا گیا ہے۔

دیپک سنگلا کی گرفتاری پر عآپ کا ردعمل سامنے آیا ہے۔ پارٹی نے مرکزی حکومت اور بی جے پی پر مرکزی ایجنسیوں کے غلط استعمال کا الزام عائد کیا ہے۔ پارٹی کے لیڈران کا کہنا ہے کہ اپوزیشن پارٹیوں کو ڈرانے اور ان کی سیاسی سرگرمیوں کو روکنے کے لیے ای ڈی، سی بی آئی اور دیگر ایجنسیوں کا استعمال کیا جا رہا ہے۔ عآپ لیڈر آتشی نے الزام عائد کیا ہے کہ ’’جس طرح مرکزی حکومت نے مغربی بنگال میں ای ڈی اور سی بی آئی کو ہتھیار بنا کر استعمال کیا اسی طرح اب پنجاب اور گوا میں بھی ایجنسیوں کے ذریعہ سیاسی دباؤ بنایا جا رہا ہے۔‘‘

آتشی کے علاوہ عآپ لیڈر سوربھ بھاردواج نے بھی سوشل میڈیا کے ذریعہ ای ڈی کی کارروائی پر سوال اٹھایا۔ انہوں نے کہا کہ ’’گوا کے شریک انچارج دیپک سنگلا کے دہلی اور گوا واقع کئی ٹھکانوں پر چھاپے مارے کی ہے۔‘‘ ساتھ ہی انہوں نے الزام عائد کیا کہ ’’عام آدمی پارٹی کے لیڈران کو مسلسل ای ڈی، سی بی آئی اور اے سی بی جیسی ایجنسیوں کے ذریعہ نشانہ بنایا جا رہا ہے۔‘‘