پانچ ریاستوں میں 12 نومبر سے 7 دسمبر تک انتخابات، 11 دسمبرکو ووٹ شماری

نئی دہلی: انتخابی کمیشن نے پانچ ریاستوں کے اسمبلی انتخابات کی تاریخوں کا آج اعلان کردیا۔ چھتیس گڑھ میں اسمبلی انتخابات دومراحل میں 12 اور 20 نومبرکو مدھیہ پردیش اور میزورم میں ایک مرحلہ میں 28 نومبر، راجستھان اور تلنگانہ میں بھی ایک مرحلہ میں 7 دسمبرکو ہوں گے۔ سبھی ریاستوں میں ووٹوں کی گنتی 11دسمبرکو ہوگی۔

چیف انتخابی کمشنر اوپی راوت نے آج پریس کانفرنس میں یہ اعلان کیا۔ اسی کے ساتھ پانچوں ریاستوں میں انتخابی ضابطہ اخلاق نافذ ہوگیا ہے۔ انھوں نے کہا کہ ان سبھی انتخابات میں نئی وی وی پیٹ مشینیں استعمال کی جائیں گی۔

راوت نے بتایا کہ چھتیس گڑھ کے نکسلی انتہا پسندی سے متاثرہ علاقوں کی 18سیٹوں کے لئے پولنگ 12نومبر کو اور باقی 72سیٹوں کے لئے 20 نومبر کو ہوگی۔

راوت نے بتایا کہ مدھیہ پردیش میں سبھی 230 سیٹوں کے لئے پولنگ ایک ہی مرحلہ میں 28 نومبر کوہوگی۔ میزورم کی سبھی 50 سیٹوں کے لئے ایک ہی مرحلہ میں 28 نومبر کو ہی ووٹ ڈالے جائیں گے۔

راجستھان کی 200سیٹوں کے لئے ووٹ 7دسمبر کو ڈالے جائیں گے۔ تلنگانہ میں بھی اسی دن سبھی 119سیٹوں کے لئے پولنگ ہوگی۔ ان سبھی ریاستوں میں ووٹوں کی گنتی 11دسمبر کو ہوگی۔

تلنگانہ اسمبلی انتخابات آئندہ اپریل۔مئی میں لوک سبھا انتخابات کے ساتھ ہونے تھے لیکن وزیراعلی چندر شیکھر راؤ کی کابینہ نے گزشتہ 6 ستمبر کو اسمبلی تحلیل کرنے کی سفارش کی تھی جسے گورنر نے منظور کرلیا تھا۔ اس کے مدنظر وہاں مقررہ وقت سے قبل انتخابات کرائے جارہے ہیں۔

- چھتیس گڑھ میں دو مراحل میں پولنگ ہوگی۔ پہلے مرحلے کے لئے پولنگ کا عمل 12 نومبر جبکہ دوسرے مرحکہ کے لئے پولنگ کا عمل 20 نومبر کو ہوگا۔

- مدھیہ پردیش اور میزورم میں پولنگ کا عمل 28 نومبر کو ہوگا۔

- راجستھان اور تلنگانہ میں اسمبلی انتخابات کے لئے پولنگ 7 دسمبر کو ہوگی۔

- پانچوں ریاستوں کے لئے ووٹ شماری 11 دسمبر کو کی جائے گی۔

(یو این آئی ان پٹ کے ساتھ)