دہلی میں گرمی سے لوگوں کا برا حال، بارش کا کوئی امکان نہیں

نئی دہلی: قومی راجدھانی دہلی میں گرمی کی وجہ سے لوگوں کا برا حال ہے اور اور بارش کا کوئی امکان نظر نہیں آ رہا۔ دریں اثنا، محکمہ موسمیات نے اہم الرٹ جاری کر دیا ہے۔ تازہ پیشن گوئی کے مطابق ہفتہ کے روز زیادہ سے زیادہ درجہ حرارت 44 ڈگری سیلسیس کے آس پاس رہنے کا امکان ہے۔

محکمہ موسمیات نے کہا کہ ہفتہ کے روز کم ازکم درجہ حرارت 28.7 ڈگری سیلسیس ریکارڈ کیا گیا جو معمول سے ایک ڈگری زیادہ ہے۔ صبح 8.30 بجے نمی کی سطح 34 فیصد رہی۔ محکمہ موسمیات کا کہنا ہے کہ بعض مقامات پر لو چل سکتی ہے۔ بارش کا کوئی امکان نہیں ہے۔

محکمہ موسمیات نے کہا کہ ’’آسمان صاف رہے گا۔ کہیں کہیں لو چل سکتی ہے‘‘۔ لو کے حوالہ سے دہلی میں یلو الرٹ جاری کیا گیا ہے۔ رپورٹ کے مطابق ویسٹرن ڈسٹربنس کی سرگرمیاں کمزور پڑنے لگی ہیں، یہی وجہ ہے کہ راجدھانی میں ایک بار پھر شدید گرمی کا دور شروع ہو گیا ہے۔

دن بھر تیز دھوپ کے باعث لوگوں کو گھروں سے باہر نکلنے میں بھی پریشانی کا سامنا کرنا پڑا۔ ہوا میں نمی کی سطح 12 سے 65 فیصد کے درمیان ریکارڈ کی گئی۔ شام کے وقت غروب آفتاب کے بعد بھی لوگوں کو گرمی سے راحت نہیں ملی۔