’دہلی میٹرو کے کرائے میں اضافے کی خبریں بے بنیاد‘، ڈی ایم آر سی کی وضاحت

نئی دہلی: دہلی میٹرو ریل کارپوریشن (ڈی ایم آر سی) نے سوشل میڈیا پر گردش کرنے والی ان خبروں کو بے بنیاد قرار دیا ہے جن میں کرائے میں اضافے کا دعویٰ کیا گیا تھا۔ ڈی ایم آر سی نے واضح کیا ہے کہ فی الحال کرائے میں کسی بھی طرح کے اضافے کا کوئی منصوبہ نہیں ہے اور نہ ہی اس حوالے سے کوئی تجویز زیر غور ہے۔

ڈی ایم آر سی نے سماجی رابطے کی ویب سائٹ 'ایکس' پر جاری ایک بیان میں کہا، ’’یہ وضاحت ان سوشل میڈیا پوسٹس کے تناظر میں دی جا رہی ہے جن میں دعویٰ کیا جا رہا ہے کہ دہلی میٹرو کے کرایوں میں تبدیلی کی گئی ہے۔ ہم واضح کرنا چاہتے ہیں کہ دہلی میٹرو کے کرایوں میں کوئی تبدیلی نہیں کی گئی۔ کرایے میں ترمیم صرف حکومت کی جانب سے نامزد کردہ ایک آزاد فیس فکسیشن کمیٹی کے ذریعے کی جا سکتی ہے، اور فی الحال ایسی کسی کمیٹی کے قیام کی کوئی تجویز نہیں ہے۔‘‘

ڈی ایم آر سی نے عوام سے اپیل کی کہ وہ افواہوں پر یقین نہ کریں اور مصدقہ ذرائع سے ہی معلومات حاصل کریں۔ مزید برآں، ادارے نے اپنے وضاحتی بیان میں یہ بھی کہا کہ میٹرو کے کرایوں میں اضافے سے متعلق جو خبریں گردش کر رہی ہیں، وہ بے بنیاد اور گمراہ کن ہیں۔

یہ وضاحت ان افواہوں کے بعد آئی ہے جو کچھ سوشل میڈیا پوسٹس کے ذریعے پھیلائی جا رہی تھیں، جن میں دعویٰ کیا گیا تھا کہ دہلی میٹرو کے کرایے میں اضافہ کر دیا گیا ہے۔ تاہم، ڈی ایم آر سی نے اس خبر کو جھوٹا قرار دیتے ہوئے واضح کیا کہ فی الحال ایسا کوئی فیصلہ نہیں کیا گیا۔