دگ وجے سنگھ نے وزیر اعظم نریندر مودی کو خط لکھ کر سی بی ایس ای کی ’سہ لسانی‘ پالیسی پر فوری روک لگانے کا کیا مطالبہ

کانگریس کے سینئر رہنما اور راجیہ سبھا رکن دگ وجے سنگھ نے وزیر اعظم نریندر مودی کو خط لکھ کر سی بی ایس ای کی جانب سے نویں جماعت کے طلبہ کے لیے جاری تعلیمی سیشن کے وسط میں سہ لسانی پالیسی کو لازمی طور پر نافذ کیے جانے پر تشویش کا اظہار کیا ہے اور اسے فی الحال ملتوی کرنے کی اپیل کی ہے۔ تعلیم، خواتین، اطفال، نوجوانوں اور کھیلوں سے متعلق پارلیمانی قائمہ کمیٹی کے چیئرمین دگ وجے سنگھ نے کہا کہ کافی تعداد میں اساتذہ، درسی کتب اور نئے نظام کے نفاذ سے قبل کسی تیاری کے بغیر، سیشن کے درمیان اس پالیسی کو اچانک نافذ کرنے سے شدید بدنظمی پیدا ہو سکتی ہے۔

کانگریس رہنما نے کہا کہ صورتحال کچھ ویسی ہی ہو سکتی ہے جیسی سی بی ایس ای کے آن اسکرین مارکنگ (او ایس ایم) نظام کو جلد بازی میں نافذ کرنے کے دوران پیدا ہوئی تھی۔ وزیر اعظم مودی کو لکھے خط میں دگ وجے سنگھ نے کہا کہ ’’میں سی بی ایس ای کی نویں جماعت کے طلبہ کے لیے موجودہ سیشن کے وسط میں سہ لسانی پالیسی کو لازمی طور پر نافذ کیے جانے کی مخالفت کرنے والے فکرمند والدین کے ایک گروپ کا میمورنڈم آپ کو بھیج رہا ہوں۔‘‘

دگ وجے سنگھ نے کہا کہ ان کے علم میں یہ بات بھی لائی گئی ہے کہ دسمبر 2025 میں ہونے والے اجلاس میں سنٹرل بورڈ آف سیکنڈری ایجوکیشن (سی بی ایس ای) کی گورننگ باڈی نے نصاب کمیٹی کی اس سفارش کو منظوری دی تھی۔ اس کے مطابق این سی ای آر ٹی کی جانب سے زبانوں کی درجہ بند (گریڈڈ) درسی کتب جاری ہونے تک اسکول موجودہ تعلیمی منصوبہ، خصوصاً زبان سے متعلق انتظامات کو جاری رکھیں۔

راجیہ سبھا رکن دگ وجے سنگھ نے کہا کہ اپنی ہی گورننگ باڈی کے فیصلے کے باوجود، سی بی ایس ای نے 15 مئی 2026 کو ایک سرکلر جاری کر کے یکم جولائی 2026 سے نویں جماعت میں تیسری زبان کی پڑھائی نافذ کرنے کی ہدایت دی۔ انہوں نے کہا کہ نیشنل کونسل آف ایجوکیشنل ریسرچ اینڈ ٹریننگ (این سی ای آر ٹی) نے اب تک زبانوں کی گریڈڈ درسی کتب جاری نہیں کی ہیں اور اسی لیے سی بی ایس ای نے این سی ای آر ٹی کی چھٹی جماعت کی کتابوں کے استعمال کی سفارش کی ہے۔

کانگریس رہنما دگ وجے سنگھ نے مزید کہا کہ ’’یہ واضح نہیں ہے کہ سی بی ایس ای نے اپنی ہی گورننگ باڈی کے فیصلے کو اتنے واضح طور پر کیسے اور کیوں بدل دیا، اور وہ بھی ایسے طریقے سے جو ملک بھر کے ہزاروں اسکولوں کے تعلیمی منصوبے کو متاثر کر سکتا ہے۔‘‘

قابل ذکر ہے کہ دگ وجے سنگھ نے چند روز قبل نیٹ-یو جی امتحان کے پرچہ لیک ہونے کے معاملے کو لے کر بھی وزیر اعظم مودی کو خط لکھا تھا۔ انہوں نے حکومت سے گزشتہ 8 برسوں میں نیشنل ٹیسٹنگ ایجنسی (این ٹی اے) کے ذریعے منعقدہ امتحانات میں پرچہ لیک یا دیگر بے ضابطگیوں اور ان پر کی گئی کارروائی کی تفصیلات دیتے ہوئے ایک ’وائٹ پیپر‘ جاری کرنے کا مطالبہ کیا تھا۔ ساتھ ہی انہوں نے کہا تھا کہ ایسے وقت میں جب لاکھوں طلبہ شدید ذہنی دباؤ میں ہیں، امتحانی نظام پر ان کا بھروسہ برقرار رکھنا انتہائی ضروری ہے۔