دہلی کی لائف لائن ’میٹرو‘ کا نیا ریکارڈ، 2025 میں 235 کروڑ سے زائد مسافروں نے کیا سفر

دہلی کی لائف لائن کہی جانے والی میٹرو تقریباً ہر روز نئے ریکارڈ قائم کررہی ہے۔ اسی کڑی میں ڈی ایم آر سی نے بتایا ہے کہ دہلی میٹرو ریل کارپوریشن نے سال 2025 کے دوران 235.8 کروڑ مسافروں کے سفر کا ریکارڈ درج کر کے ایک نیا سنگِ میل قائم کیا ہے۔ یہ اوسطاً 64.60 لاکھ روزآنہ سفر کے برابر ہے۔ یہ اندازہ 2024 کے 223.5 کروڑ سے بھی کا فی زیادہ ہے۔

ڈی ایم آر سی کی جانب سے اتوار کو دی گئی تفصیل کے مطابق ہندوستان میں میٹرو کے ذریعے روزانہ ہونے والے تقریباً 1.15 کروڑ مسافروں کے سفر میں سے صرف دہلی میٹرو کا حصہ 55 فیصد سے زیادہ ہے ۔ قابل ذکر ہے کہ دہلی- این سی آر خطے میں میٹرو نیٹ ورک کی مجموعی لمبائی 416 کلو میٹر ہے جس میں 303 اسٹیشن شامل ہیں۔ دہلی میٹرو روزانہ 343 ٹرینوں کے ذریعے تقریباً 4,508 چکر لگاتی ہے اور مجموعی طور پر تقریباً 1.40 لاکھ کلو میٹر کا فاصلہ طے کرتی ہے۔ اس کی وقت کی پابندی کی شرح 99.9 فیصد ہے جس کی وجہ سے اسے دنیا کے قابلِ اعتماد ترین سسٹم میں شمار کیا جاتا ہے۔

ڈی ایم آر سی کے مطابق مسافروں کی تعداد میں مسلسل اضافہ ہو رہا ہے ۔ سال 2024 میں مجموعی طور پر 223.5 کروڑ مسافروں نے میٹرو میں سفر کیا تھا جس کا یومیہ اوسط 62.39 لاکھ تھا جبکہ سال 2025 میں یہ تعداد بڑھ کر 235.8 کروڑ ہو گئی جس کا یومیہ اوسط 64.60 لاکھ رہا۔ اس دوران ایک دن میں سب سے زیادہ مسافروں کے سفر کا ریکارڈ بھی ٹوٹ گیا۔ 18 نومبر 2024 کو 78.67 لاکھ مسافروں کے مقابلے میں 8 اگست 2025 کو ریکارڈ 81.87 لاکھ سے زٓئد افراد نے میٹرو میں سفر کیا۔ یہ اضافہ کووڈ کے بعد میٹرو پر مسافروں کے بڑھتے اعتماد کو ظاہر کرتا ہے۔

تکنیکی اعتبار سے دہلی میٹرو دنیا کے سب سے بڑے ڈرائیور کے بغیر چلنے والے میٹرو سسٹم میں سے ایک ہے ۔ پنک لائن (71.55 کلو میٹر) اور میجنٹا لائن (49.19 کلو میٹر) پر اس وقت 80 ٹرینیں بغیر ڈرائیورچل رہی ہیں۔ مستقبل کی ضروریات کو مدنظر رکھتے ہوئے چوتھے مرحلے کے ترجیحی کوریڈورز کی تعمیر کا کام تیزی سے جاری ہے ۔ آئندہ آپریشن کے لیے 52 نئی ٹرینیں خریدی جا رہی ہیں جن میں سے 18 ٹرینیں پہلے ہی موصول ہو چکی ہیں۔

دہلی میٹرو نے نہ صرف سفر کے وقت میں کمی کی ہے بلکہ سڑکوں پر ٹریفک جام کم کرنے اور ماحول دوست نقل و حمل کو فروغ دینے میں بھی اہم کردار ادا کیا ہے۔ ملک گیر سطح پر ہندوستان کا میٹرو نیٹ ورک 26-2025 میں 1 ہزار 143 کلومیٹر سے زیادہ ہوچکا ہے۔ جو 26 شہروں میں پھیلا ہے۔ یہاں روزآنہ اوسطاً 1.15 کروڑ مسافروں کا سفر ہوتا ہے جس میں دہلی میٹرو کا حصہ 55 فیصد سے زیادہ۔