زہریلی ہوا سے دہلی والوں کو نہیں ملی راحت نہیں، اے کیو آئی 400 سے تجاوز

قومی راجدھانی میں سردی بڑھنے کے باوجود فضائی آلودگی میں کمی کے کوئی آثار نظر نہیں آرہے ہیں۔ صبح سے ہی آسمان پر اسموگ کی گھنی چادر نظر آرہی ہے جس سے شہریوں کو شدید پریشانی کا سامنا ہے۔ دہلی این سی آر میں ہوا کا معیار آج 350 سے 400 کے اوپر ہے، جو’انتہائی خراب‘ سے ’سنگین‘ ہو گیا ہے۔ فضائی آلودگی کودیکھتے ہوئے دہلی میں گریپ 3 بھی نافذ کر دیا گیا ہے باوجوداس کے کوئی راحت ملتی نظرآرہی ہے۔

محکمہ موسمیات کے مطابق دہلی میں کم سے کم درجہ حرارت میں کمی کا سلسلہ جاری ہے۔ گزشتہ 24 گھنٹوں کے دوران کم سے کم درجہ حرارت 12 ڈگری سینٹی گریڈ ریکارڈ کیا گیا جب کہ زیادہ سے زیادہ درجہ حرارت 22 ڈگری سینٹی گریڈ رہا۔ صبح اور شام کو شدید سردی کا سامنا ہے۔ اس دوران ہلکی دھند اور کہرا نظر آرہا ہے۔

آلودگی کی بات کریں تو دہلی کا آج بوانا علاقہ سب سے زیادہ آلودہ تھا۔ سنٹرل پولیوشن کنٹرول بورڈ کے مطابق یہاں ایئر کوالٹی انڈیکس 427 ریکارڈ کیا گیا جو کہ شدید زمرے میں آتا ہے۔ دوسرے نمبر پر وزیر پور ڈپو نے 401 اے کیوآئی ریکارڈ کیا۔ وویک وہار نے 396،آئی ٹی او394، آنند وہار 384، اشوک وہار 392، چاندنی چوک 384، سونیا وہار 380 اور نجف گڑھ میں اے کیوآئی 324 سطح ریکارڈ کی گئی۔

راجدھانی دہلی کے کئی علاقوں میں اب بھی اے کیوآئی 400 سے اوپر ہے۔ اگرچہ کچھ علاقوں میں ہوا کے معیار میں معمولی بہتری آئی ہے، لیکن یہ اب بھی انتہائی خراب سے سنیگن زمرے میں ہے۔ آنے والے دنوں میں سردیوں کے موسم میں شدت آنے سے صورتحال مزید خراب ہونے کا خدشہ ہے۔

فضائی آلودگی کی وجہ سے قومی راجدھانی گیس چیمبر میں تبدیل ہو رہی ہے جس میں سانس لینا مشکل ہو رہا ہے۔ سانس کے مریضوں کو سب سے زیادہ مشکلات کا سامنا ہے۔ اسپتالوں میں سانس کے مریضوں کی تعداد بڑھ رہی ہے۔ اس سلسلے میں میڈانتا اسپتال کے چیئرمین ڈاکٹر نریش تریہن نے کہا کہ موجودہ صورتحال کو دیکھتے ہوئے حکومت کو فوری کارروائی کرنی چاہئے۔

آلودگی کی وجہ سے دہلی میں گریپ-3 نافذ کیا گیا ہے۔ اس کے باوجود ہوا کا معیار اب بھی بہتر نہیں ہو رہاہے۔ دہلی حکومت نے لوگوں کو پبلک ٹرانسپورٹ استعمال کرنے کا مشورہ بھی دیا ہے۔ پانچویں جماعت تک کے اسکولوں کو ہائبرڈ موڈ پر رکھا گیا ہے اور لوگوں کو گھر سے ہی کام کرنے کا مشورہ دیا گیا ہے۔