دہلی شراب پالیسی کیس: سنجے سنگھ کے قریبی ساتھیوں کے خلاف کارروائی، سرویش مشرا اور وویک تیاگی کو ای ڈی نے کیا طلب

نئی دہلی: دہلی شراب پالیسی معاملے میں انفورسمنٹ ڈائریکٹوریٹ (ای ڈی) نے اب عام آدمی پارٹی (عآپ) کے رکن راجیہ سبھا سنجے سنگھ کے قریبی لوگوں کے خلاف کریک ڈاؤن شروع کر دیا ہے۔ ای ڈی نے سرویش مشرا اور وویک تیاگی کو پوچھ گچھ کے لیے طلب کیا ہے، جنہیں سنجے سنگھ کا قریبی مانا جاتا ہے۔ خیال رہے کہ ای ڈی نے سنجے سنگھ کو بدھ کو گرفتار کیا تھا۔ اس کے بعد انہیں دہلی کی راؤز ایونیو کورٹ میں پیش کیا گیا، جہاں عدالت نے قبول کیا کہ ای ڈی کے ذریعہ سنجے سنگھ کی گرفتاری غیر معقول یا غیر منطقی نہیں ہے۔

عدالت نے سنجے سنگھ کو 5 دن کے لیے ای ڈی ریمانڈ پر بھیج دیا ہے۔ سنجے سنگھ پر جرم سے ہونے والی آمدنی سے براہ راست جڑے ہونے کا الزام ہے۔

دہلی کے سابق نائب وزیر اعلی منیش سسودیا اس معاملے میں پہلے ہی جیل میں ہیں۔ دراصل، سسودیا کا قریبی سمجھے جانے والا تاجر دنیش اروڑہ مبینہ گھوٹالے سے متعلق منی لانڈرنگ کیس میں ملزم تھا، جو بعد میں سرکاری گواہ بن گیا۔ اس نے کہا ’’اس کے بدلے میں سنگھ کے ایک ایسوسی ایٹ/ٹیم ممبر یعنی وویک تیاگی کو امت اروڑہ کی کاروباری کمپنی یعنی ارالیاس ہاسپیٹلیٹی پرائیویٹ لمیٹڈ میں حصہ دیا گیا تھا۔‘‘

تاہم عام آدمی پارٹی کے سربراہ اروند کیجریوال کا کہنا ہے کہ سنجے سنگھ نے کوئی غلط کام نہیں کیا ہے۔ انہیں جھوٹے الزامات میں پھنسایا جا رہا ہے۔ وہیں، بی جے پی کا کہنا ہے کہ وہ مبینہ شراب گھوٹالہ میں رکن پارلیمنٹ سنجے سنگھ کی گرفتاری سے گھبرائے ہوئے ہیں اور انہیں بچانے کے لیے بڑے پیمانے پر اپنے وسائل خرچ کر رہے ہیں۔