دہلی اسمبلی نے رقم کی تاریخ، شمسی توانائی اور کاغذ سے پاک ملک کی پہلی اسمبلی

نئی دہلی: دہلی اسمبلی نے اتوار کے روز ایک تاریخی قدم اٹھاتے ہوئے خود کو مکمل طور پر شمسی توانائی پر منتقل کر دیا اور اپنی تمام تر کارروائی کو کاغذ سے پاک بنا دیا۔ اس پیش رفت کے ساتھ دہلی اسمبلی ملک کی پہلی ایسی اسمبلی بن گئی ہے جو ایک ساتھ ماحولیاتی اور انتظامی دونوں حوالوں سے سبز اور ڈیجیٹل بن چکی ہے۔

مرکزی وزیر مملکت برائے قانون و انصاف جناب ارجن رام میگھوال نے اسمبلی میں 500 کلوواٹ کے جدید شمسی توانائی پلانٹ اور ڈیجیٹل نظام کا افتتاح کیا۔ اس موقع پر اسمبلی کے اسپیکر وجیندر گپتا، وزیراعلیٰ ریکھا گپتا، نائب صدر موہن سنگھ بشٹ، توانائی وزیر آشیش سود، اور دیگر اراکین اسمبلی موجود تھے۔

شمسی توانائی پلانٹ اسمبلی کی توانائی کی تمام ضروریات کو پورا کرے گا۔ اسپیکر کے مطابق، اس سے ماہانہ تقریباً 15 لاکھ روپے کی بجلی کی بچت ہوگی، جو سالانہ 1.75 کروڑ روپے تک پہنچ سکتی ہے۔ اضافی توانائی کو نیٹ میٹرنگ کے ذریعے قومی گرڈ میں شامل کیا جائے گا۔

دوسری طرف، اسمبلی کی کارروائی مکمل طور پر ڈیجیٹل ہو گئی ہے۔ کاغذ کا استعمال ختم کر کے تمام دستاویزات، کارروائی، حاضری، ووٹنگ اور فائل تک رسائی ایک ہی مربوط نظام سے کی جائے گی۔ ارکان اسمبلی کو اس نظام کی تربیت دی گئی اور افتتاحی روز اس کا عملی مظاہرہ بھی کیا گیا۔

اسپیکر وجیندر گپتا نے کہا کہ "1912 میں قائم یہ تاریخی عمارت ملک کی پہلی پارلیمان کا مقام تھی، اور آج ہم اسے جدید ٹیکنالوجی اور ماحولیاتی ذمہ داری کے تقاضوں سے ہم آہنگ کر رہے ہیں۔" انہوں نے بتایا کہ یہ ڈیجیٹل نظام صرف 100 دنوں میں مکمل ہوا اور پیر کے روز اسمبلی کا مانسون اجلاس پہلی بار مکمل طور پر شمسی توانائی سے چلنے والا اور کاغذ سے پاک ہوگا۔

وزیراعلیٰ ریکھا گپتا نے اسے اپنی حکومت کی ماحولیاتی ذمہ داری کی علامت قرار دیا اور کہا کہ دہلی کو ملک کی راجدھانی ہونے کے ناطے جدید طرزِ حکمرانی میں بھی قیادت کرنی چاہیے۔

مرکزی وزیر ارجن رام میگھوال نے دہلی اسمبلی کی اس پیش رفت کو دیگر ریاستی اسمبلیوں کے لیے ایک مثال قرار دیا اور کہا کہ "یہ صرف ایک تکنیکی تبدیلی نہیں بلکہ ادارہ جاتی سوچ میں بھی تبدیلی ہے، اور مرکزی حکومت اس میں ہر ممکن تعاون دے گی۔"

یہ اقدام دہلی اسمبلی کو نہ صرف ایک جدید اسمبلی میں تبدیل کرتا ہے بلکہ یہ اس بات کا عملی ثبوت بھی ہے کہ مؤثر اور ماحول دوست حکمرانی کی شروعات جمہوری اداروں سے ہی ہوتی ہے۔