مودی حکومت نے نہیں کی 2 ہزار کروڑ کی ادائیگی، اہم دفاعی پروجیکٹ تعطل کا شکار

مودی حکومت کی وزارت دفاع کی طرف سے ٹھیکیداروں کے تقریباً 2 ہزار کروڑ روپے کے بلوں کی ادائیگی نہ ہو پانے کی وجہ سے ہندوستان بھر میں چھاونیوں اور اہم بنیادی ڈھانچے کے کام بُری طرح متاثر ہو گئے ہیں۔

ادائیگی نہ ہو پانے کی وجہ سے کم از کم 8 فضائی پٹیوں کی تجدید کاری (اپ گریڈیشن آف رن ویز) کے پروجیکٹوں کا کام متاثر ہوا ہے۔ پاکستانی سرحد سے ملحقہ علاقوں میں مختلف کاموں سے وابستہ پروجیکٹ کے علاوہ انڈین ایئر فورس کے سُلُور ایئر فورس اسٹیشن اور 6 سے زیادہ ہینگر پروجیکٹس، جن میں انبالہ اور ہاشیمارا میں رافیل کو رکھنے کے لئے بنایا جانے والا ہینگر پروجیکٹ بھی شامل ہے، تعطل کا شکار ہو گئے ہیں۔

ٹائمز آف انڈیا کی رپورٹ کے مطابق اس معاملہ میں ایم ای ایس (ملٹری انجینرنگ سروسز) بلڈرس ایسو سی ایشن آف انڈیا کے صدر پروین مہانا نے کہا ’’سلور، چنڈی گڑھ، پالم، الہ آباد اور حیدر آباد میں فضائی پٹی کا کام یا تو مکمل طور پر رُک چکا ہے یا پھر بہت سست رفتار سے چل رہا ہے۔ دراصل ٹھیکیدار رقم نہ مل پانے کی وجہ سے پریشان ہیں۔ اسی طرح انبالہ، ہاشیمورا، سرکا اور دیگر ہینگر پروجیکٹ بھی مسائل میں گھرے ہیں۔

پروین مہانا کے مطابق بلوں کی ادائیگی نہ ہونے کی وجہ سے ادھم پور اور پونے میں تیار کئے جا رہے فوجی اسپتالوں کا کام بھی متاثر ہو گیا ہے۔ انہوں نے کہا، ’’ادھم پور میں کچھ کام پورا کر لیا گیا ہے لیکن پونے میں زیادہ کام نہیں ہو سکا ہے۔ جموں و کشمیر کے پونچھ، راجوری، لیہ، کرگل اور بارامولہ میں کچھ مقامات کو چھوڑ کر دیگر تمام رہائشی پروجیکٹ روک دیے گئے ہیں۔ ‘‘ حالانکہ وزارت دفاع نے جنوری کے آخر میں تعطل شدہ کچھ بلوں کی ادائیگی کی ہے لیکن یہ رقم بھی تاحال ٹھیکیداروں تک نہیں پہنچ پائی ہے۔

وہیں انڈین ایئرفور کے ایک افسر نے بتایا کہ زیادہ تر کام میں ٹھہراؤ آ گیا ہے۔ ٹھیکیدار موجودہ وقت میں 1600 روپے سے زیادہ رقم کے تعطل شدہ بلوں کی ادائیگی نہ ہو پانے کی وجہ سے مسائل کا سامنا کر رہے ہیں۔