دہلی-این سی آر میں ’جان لیوا‘ اسموگ کا قہر جاری، زہریلی ہوا کے سبب سانس لینا مشکل

قومی راجدھانی دہلی میں ایک بار پھر زہریلی اسموگ کی موٹی چادر میں لپٹی ہوئی ہے، شہر کے مختلف حصوں میں ہوا کے معیار کا انڈیکس ’انتہائی خراب‘ زمرے میں پہنچ گیا ہے، جس سے شہریوں کی صحت کو شدید خطرہ لاحق ہے۔ مرکزی آلودگی کنٹرول بورڈ کے مطابق اہم علاقوں جیسے آئی ٹی او، غازی پور، آنند وہار اور دھولا کنواں میں اے کیو آئی کی سطح خطرناک حد تک بڑھ گئی ہے۔ وہیں ملحقہ ریاست اترپردیش میں بھی سردی کے ساتھ ہی ہوا میں آلودگی کی سطح بڑھنے کا سلسلہ جاری ہے جس کی وجہ سے لوگوں کا سانس لینا مشکل ہو گیا ہے۔

سوشل میڈیا پر گردش کر رہی دہلی کے مختلف حصوں کی تصاویر میں دیکھا جا سکتا ہے کہ کس طرح زہریلے اسموگ نے ​​پورے شہر کو اپنی لپیٹ میں لے رکھا ہے۔ حد نگاہ میں نمایاں کمی آئی ہے اور لوگوں کو صبح و شام سانس لینے میں دشواری کا سامنا ہے۔ گزشتہ روز جمعہ کی صبح بھی کہرا اور ہلکی دھند کی گھنی چادر نے دہلی اور آس پاس کے علاقوں کو اپنی لپیٹ میں لے رکھا تھا جس سے معمولات زندگی درہم برہم ہو گئے اور آج سنیچر کو بھی یہی صورتحال رہی۔ سانس کی بیماریوں میں مبتلا مریضوں کے لیے یہ صورت حال خاص طور پر پریشان کن ثابت ہو رہی ہے اور لوگوں کی ایک بڑی تعداد ماسک پہنے نظر آ رہی ہے۔

دہلی کے علاوہ این سی آر کے دیگر علاقوں میں بھی سردی کے ساتھ ساتھ فضائی آلودگی کی سطح بھی گزشتہ ایک ماہ سے مسلسل بڑھ رہی ہے جس سے لوگوں کا سانس لینا مشکل ہو گیا ہے۔ نوئیڈا اور غازی آباد میں ہوا کا معیار کافی دنوں سے ’بہت خراب‘ اور ’سنگین‘ کے درمیان رہا ہے۔ حالانکہ آج اس میں معمولی بہتری دیکھی گئی ہے، زیادہ تر علاقوں میں آج اے کیو آئی 400 سے کم ریکارڈ کیا گیا ہے۔ اتر پردیش کے بڑے شہروں میں سردی کے ساتھ فضائی آلودگی کی سطح میں بھی اضافہ ہوا ہے لیکن دہلی سے ملحق نوئیڈا، غازی آباد اور گریٹر نوئیڈا جیسے علاقوں میں صورتحال زیادہ خراب ہے۔

غازی آباد کے لونی علاقے کو چھوڑ کر آج زیادہ تر علاقوں میں آلودگی کی سطح کم ہوئی ہے، حالانکہ ہوا کا معیار ’انتہائی خراب‘ زمرے میں ہے۔ لونی میں فضائی آلودگی کی سطح آج صبح 6 بجے 405 ریکارڈ کی گئی، جب کہ اندرا پورم میں یہ 353 اور وسندھرا میں 303 تھی۔ اس کے علاوہ نوئیڈا کے سیکٹر 125 میں اے کیو آئی 372، سیکٹر 116 میں 368 نوئیڈا سیکٹر 1 میں 351 ریکارڈ کیا گیا۔