دہلی-این سی آر میں چھایا اندھیرا، کئی مقامات پر ہو رہی بارش، گرمی سے لوگوں کی ملی نجات، لیکن آبی جماؤ بڑا مسئلہ

دہلی اور اس کے قرب و جوار میں موسم بہت سہاؤنا ہو چکا ہے۔ اتوار کے روز سے ہی موسم بہت اچھا ہے اور رہ رہ کر کئی مقامات پر بارش بھی ہو رہی ہے۔ آج بھی دہلی و این سی آر میں ہلکی دھوپ چھاؤں والی حالت رہی اور شام ہوتے ہوتے کئی مقامات پر موسلادھار بارش شروع ہو گئی۔ تقریباً 6 بجے آسمان پر گھنے بادل چھا گئے اور کئی مقامات پر تاریکی دیکھنے کو ملنے لگی۔ کچھ مقامات پر پہلے ہلکی بارش شروع ہوئی، اور پھر اس نے تیزی اختیار کر لی۔

دہلی کے علاوہ نوئیڈا اور غازی آباد کے بھی کئی حصوں میں بارش دیکھنے کو مل رہی ہے۔ لگاتار تین چار دن سے بارش ہونے کے سبب درجہ حرارت میں گراوٹ دیکھی گئی ہے، جس کی وجہ سے دہلی اور این سی آر میں شدید اُمس سے لوگوں کو راحت ملی ہے۔ حالانکہ بارش کی وجہ سے کئی مقامات پر آبی جماؤ کا نظارہ دیکھنے کو مل رہا ہے، جو لوگوں کے لیے ایک بڑا مسئلہ بن کر ابھرا ہے۔

واضح رہے کہ دہلی میں گزشتہ بدھ سے ہی رہ رہ کر بارش ہو رہی ہے۔ اس وجہ سے دہلی کے ذیلی علاقوں میں آبی جماؤ کا مسئلہ پیدا ہو گیا ہے۔ اتوار کو ہوئی بارش سے ہی حالات بدتر ہو گئے ہیں۔ کئی مقامات پر پانی بھر گیا اور کئی لوگوں کی گاڑیاں بھی ڈوب گئی ہیں۔ کئی عمارتوں کے بیسمنٹ اور پارکنگ میں بھی پانی جمع ہو گیا ہے۔ پیر کی صبح کئی مقامات پر حالات کو بہتر کرنے کی کوشش کی گئی، لیکن اتم نگر، بنداپور سمیت کئی علاقوں میں از سر نو بارش نے حالات کو مزید خراب کر دیا ہے۔