لاک ڈاؤن کی خلاف ورزی: کئی مقامات پر لوگوں کو ملی دلچسپ سزا، دیکھیں تصویریں...

قانون توڑنے والوں کے خلاف کئی جگہ پولس نے لاٹھی چارج کرتے ہوئے انھیں گھر جانے کے لیے مجبور کیا، لیکن کچھ مقامات پر پولس نے لاک ڈاؤن کی خلاف ورزی کرنے والوں کو انتہائی دلچسپ سزا دی

تصویر سوشل میڈیا
تصویر سوشل میڈیا
user

قومی آوازبیورو

پورے ہندوستان میں لاک ڈاؤن کا اعلان بھلے ہی 24 مارچ کی شب 12 بجے سے کیا گیا ہو، لیکن کئی ریاستوں میں پہلے سے ہی لاک ڈاؤن کیا جا چکا تھا اور کئی ریاستوں میں تو کرفیو بھی نافذ تھا۔ اس لاک ڈاؤن اور کرفیو کے باوجود لوگ گھروں سے بلاجھجک نکلتے ہوئے نظر آئے اور حیرانی کی بات یہ ہے کہ وہ بلاسبب ہی گھر سے باہر موٹر سائیکل اور کاروں پر گھومتے نظر آئے۔ یہ حالت دہلی، اتر پردیش، بہار، پنجاب، راجستھان سمیت کئی ریاستوں میں دیکھنے کو ملی۔ جگہ جگہ پولس نے لاٹھی کا استعمال کر انھیں گھر جانے کے لیے مجبور کیا، لیکن کچھ مقامات پر پولس نے لاک ڈاؤن کی خلاف ورزی کرنے والوں کو انتہائی دلچسپ سزا دی جس کی تصویریں سوشل میڈیا پر وائرل ہو رہی ہیں۔ آپ بھی دیکھیں یہ تصویریں اور اس بات کو ممکن بنائیں کہ نہ ہی آپ بلاوجہ لاک ڈاؤن کے دوران گھر سے باہر نکلیں اور نہ ہی آپ کے رشتہ دار و دوست۔

تصویر سوشل میڈیا
تصویر سوشل میڈیا

دہلی:

وزیر اعلیٰ اروند کیجریوال نے دہلی میں لاک ڈاؤن کا اعلان پی ایم مودی کے ذریعہ پورے ہندوستان میں لاک ڈاؤن کے اعلان سے پہلے سے ہی کر رکھا ہے۔ لیکن کئی لوگوں نے اس کو بہت ہلکے میں لیا اور سڑکوں پر موٹر سائیکل و کار کے ساتھ گھومتے ہوئے نظر آئے۔ دہلی پولس نے کچھ مقامات پر ایسے لوگوں کو سزا دینے کا ایک نایاب طریقہ نکالا اور سب کو پکڑ پکڑ کر انھیں ایک پیپر ہاتھ میں پکڑنے کے لیے دیا جس پر لکھا تھا "میں سماج کا دشمن ہوں، میں بنا کام کے باہر گھوموں گا۔" اس پیپر کو پکڑا کر ان کی تصویریں دہلی پولس والوں نے کھینچیں تاکہ دوسرے لوگ اس سے سبق حاصل کر لاک ڈاؤن کے درمیان گھر سے باہر نہ نکلیں۔

اتر پردیش:

اتر پردیش کے کانپور کی ایک تصویر سوشل میڈیا پر وائرل ہو رہی ہے جس میں دو دوست ایک دوسرے کا کان پکڑ کر اٹھک بیٹھک کر رہے ہیں۔ ساتھ میں کچھ پولس والے کھڑے ہیں۔ یہ دونوں دوست دراصل کانپور کی گلیوں میں مٹر گشتی کر رہے تھے جنھیں پکڑ کر یو پی پولس نے سزا دی اور دونوں دوستوں کو ایک دوسرے کا کان پکڑ کر اٹھک بیٹھک کرنے کی سزا سنائی۔ بعد میں یہ تصویر سوشل میڈیا پر وائرل ہو گئی۔

تصویر سوشل مڈیا
تصویر سوشل مڈیا

گجرات:

پی ایم مودی کے رول ماڈل گجرات کی بھی ایک تصویر خوب وائرل ہو رہی ہے جس میں ایک چوراہے پر موجود ٹریفک سگنل کے پاس ہی کچھ لوگ اٹھک بیٹھک کر رہے ہیں۔ تصویر میں کچھ پولس والے ڈنڈا لے کر کھڑے ہوئے نظر آ رہے ہیں اور وہیں پاس میں ایک موٹر سائیکل کھڑی ہے۔ تصویر سے اندازہ ہوتا ہے کہ اس موٹرسائیکل سے ہی وہ شخص بلاوجہ گھوم رہا ہوگا جب پولس نے انھیں دیکھ لیا اور رکوا کر اٹھک بیٹھک کی سزا سنائی۔

تصویر سوشل میڈیا
تصویر سوشل میڈیا

جموں و کشمیر:

جموں کی ایک دلچسپ تصویر سامنے آئی ہے جس میں کچھ لوگ سفید گول دائرے کے اندر بیٹھے ہوئے ہیں۔ ایک نیوز پورٹل پر شائع اس تصویر کے بارے میں لکھا گیا ہے کہ لاک ڈاؤن کی اپیل کو درکنار کرتے ہوئے کچھ لوگ جموں میں جاری بندشوں کو توڑ کر شہر میں گھوم رہے تھے۔ ان کے خلاف جموں پولس نے سختی دکھائی اور ان سے نمٹنے کے لیے ایک نایاب ترکیب اپنائی۔ پورٹل پر لکھا گیا ہے کہ جموں پولس شہر کے اہم چوک چوراہوں پر ناکہ لگا کر ان لوگوں کی شناخت کر رہی ہے جو بلا ضروری گھر سے باہر نکلے ہوئے ہیں۔ انھیں پکڑ کر چوک پر لایا جاتا ہے جہاں چونے کے گول دائرے بنے ہوئے ہیں۔ ان دائروں میں پکڑے گئے لوگوں کو کافی وقت تک بٹھایا جاتا ہے اور انھیں کورونا وائرس سے بچنے کے لیے ضروری پروٹوکول سمجھایا جاتا ہے۔

تصویر سوشل میڈیا
تصویر سوشل میڈیا

مزید کچھ تصویریں لاک ڈاؤن کی خلاف ورزی کرنے والوں کو سزا دیتی ہوئی پولس کی سوشل میڈیا پر وائرل ہو رہی ہیں، لیکن وہ کس ریاست کی ہیں، اس سلسلے میں تصدیق کے ساتھ کچھ نہیں کہا جا سکتا۔ ایک تصویر کافی وائرل ہو رہی ہے جس میں پولس والوں نے کئی لوگوں کو ایک لائن میں بٹھا دیا اور انھیں مرغا بنا دیا ہے۔ تصویر میں ایک طرف کئی ساری موٹر سائیکل کھڑی ہوئی نظر آ رہی ہیں جس سے اندازہ ہوتا ہے کہ وہ سڑک پر آوارہ گردی کر رہے تھے۔

لاک ڈاؤن کی خلاف ورزی: کئی مقامات پر لوگوں کو ملی دلچسپ سزا، دیکھیں تصویریں...
Published: 25 Mar 2020, 7:40 PM
next