دون اسکول اور آئی آئی ٹی روڑکی میں بھی کورونا کا قہر

دہرادون / روڑکی: اتراکھنڈ میں کورونا وائرس کے انفیکشن کی دوسری لہر پہلے کے مقابلے میں زیادہ بھیانک ثابت ہو رہی ہے۔ دہرادون کے عالمی شہرت یافتہ دون اسکول اور ضلع ہریدوار کے روڑکی میں واقع انڈین انسٹی ٹیوٹ آف ٹیکنالوجی (آئی آئی ٹی) میں طلبہ اور اساتذہ کے کورونا وائرس سے متاثر ہونے سے اس تاثر کو مزید تقویت ملی ہے۔

منگل کے روز ریاست میں کورونا وائرس سے متاثر ہونے والے 791 افراد میں سے دون اسکول کے کل 12 طلبہ اور اساتذہ متاثر پائے گئے ہیں۔ دہرادون کے ضلع افسر آشیش سریواستو نے بتایا کہ اسکول کی صورتحال سے نمٹنے کے لئے انتظامیہ احتیاطی اقدامات کر رہی ہے۔

نیز اسکول انتظامیہ بھی تمام ضروری اقدامات اور ہدایات پر عمل آوری کو یقینی بنا رہی ہے۔ انہوں نے کہا کہ اسکول نے اپنے تمام طلبہ، اساتذہ اور عملہ کے لئے ریزیڈنٹ ڈاکٹر کی نگرانی میں ایکشن پلان تیار کیا تھا تاکہ اس وبا کو پھیلنے سے روکا جاسکے۔

سریواستو نے بتایا کہ تمام ملازمین اور طلبہ کے لئے لازمی آر ٹی پی سی آر ٹیسٹ کیا جائے گا۔ انہوں نے کہا کہ "ٹیسٹ میں مثبت پائے جانے والے افراد کو قرنطینہ میں رکھا گیا ہے۔ نیز ان کے ساتھ رابطے میں آنے والوں کا بھی سراغ لگانا شروع کر دیا گیا ہے۔

اس کے علاوہ، روڑکی میں واقع آئی آئی ٹی میں کورونا وائرس سے متاثرہ طلبہ کی تعداد میں مسلسل اضافے کے پیش نظر انسٹی ٹیوٹ انتظامیہ نے طلبہ کے گھر سے واپس لوٹنے پر پابندی عائد کر دی ہے۔ یہاں چار ہاسٹل سیل کر دیئے گئے ہیں۔ ابھی تک 72 اساتذہ اور طلبہ کے وائرس سے متاثر ہونے کی اطلاع ہے۔