کورونا کی پھر ریکارڈ تعداد: گزشتہ 24 گھنٹوں میں ایک لاکھ 31 ہزر نئے کیسز، 800 سے زیادہ اموات

نئی دہلی: کورونا کی وبا خطرناک شکل اختیار کر چکی ہے اور روز ریکارڈ تعداد میں معاملے ریکارڈ ہو رہے ہیں۔ گزشتہ 24 گھنٹوں میں ایک بار ایک بار پھر کورونا کے معاملوں نے اپنے تمام ریکارڈ توڑ ڈالے ہیں۔ ریاستی حکومتوں کی جانب سے جاری کردہ اعدادوشمار کے مطابق، گزشتہ روز 1.31 لاکھ نئے کیسز رپورٹ کئے گئے ہیں۔ یہ کورونا وبا کی شروعات سے اب تک کی سب سے بڑی تعداد ہے۔

گزشتہ 24 گھنٹوں کے دوران ایک لاکھ 31 ہزار سے زیادہ کیسز رپورٹ ہوئے ہیں جبکہ 800 سے زیادہ افراد کی جان چلی گئی۔ اس اثنا میں 60 ہزار سے زیادہ مریض صحت یاب ہو گئے۔ اب ملک میں فعال کیسز کی تعداد تیزی سے 10 لاکھ کی جانب گامزن ہے، فی الحال یہ تعداد 9.74 لاکھ تک پہنچ چکی ہے۔

ملک میں اس وقت سب سے زیادہ بری حالت مہاراشٹر کی ہے، جہاں گزشتہ دس دن سے ہر روز 50 ہزار سے زیادہ کیسز رپورٹ ہو رہے ہیں۔ گزشتہ روز بھی مہاراشٹر میں 56 ہزار نئے کیسز درج کئے گئے، صرف ممبئی میں ہی نو ہزار کے قریب معاملے سامنے آئے۔ اس کے علاوہ دہلی میں بھی گزشتہ روز ساڑھے سات ہزار معاملے سامنے آئے ہیں، جنہوں نے گزشتہ قریب 6 مہینے کے تمام ریکارڈ توڑ دئے ہیں۔

دہلی-مہاراشٹر کے علاوہ یوپی میں بھی اب کورونا بے قابو ہو چلا ہے۔ یوپی میں گزشتہ روز 8 ہزار سے زیادہ کیسز درج کئے گئے ہیں۔ جو کورونا وبا کی شروعات سے اب تک کی سب سے بڑی تعداد ہے۔ ایسے حالات میں کئی ریاستیں عروج کو پہنچ رہی ہیں، تو تشویش کا باعث ہے۔

کورونا وبا کی دوسری لہر کے درمیان وزیر اعظم نریندر مودی نے وزرائے اعلیٰ کے ساتھ میٹنگ کی۔ وزیر اعظم مودی نے اشارے دئے ہیں کہ ملک گیر لاک ڈاؤن نافذ نہیں ہوگا۔ حالانکہ جو ریاست نائٹ کرفیو لگا رہی ہے وہ صحیح ثابت ہو سکتا ہے۔ وزیر اعظم مودی نے اپیل کی ہے کہ اسے کورونا کرفیو کہیں۔ ساتھ ہی وزیر اعظم مودی نے ٹیسٹنگ بڑھانے کو کہا ہے، جس میں آر ٹی پی سی آر ٹیسٹنگ کی تعداد 70 فیصد تک رکھنے کی بات کہی ہے۔