کورونا کے بڑھتے معاملوں سے دہشت میں نوئیڈا، نائٹ کرفیو اب 8 کی جگہ 10 گھنٹے

پورے ہندوستان میں کورونا انفیکشن کا قہر جاری ہے۔ اس درمیان کچھ شہر ایسے ہیں جہاں کورونا انفیکشن کی رفتار فکر انگیز حد تک زیادہ ہے۔ ان شہروں میں نوئیڈا بھی شامل ہے اور اسی لیے ضلع میں نائٹ کرفیو کے گھنٹوں میں تھوڑا اضافہ کرنے کا فیصلہ لیا گیا ہے۔ پولس کمشنر کے میڈیا انچارج پنکج کمار سنگھ نے جانکاری دیتے ہوئے بتایا کہ "17 جون کو میرٹھ ڈویژن میں کورونا وائرس کے انفیکشن کو کنٹرول کرنے کے لیے اتر پردیش کے وزیر اعلیٰ یوگی آدتیہ ناتھ کی صدارت میں ایک میٹنگ ہوئی تھی۔ میٹنگ میں کورونا وائرس انفیکشن کو روکنے کے لیے نائٹ کرفیو بڑھانے کی ہدایت دی گئی تھی۔"

پنکج کمار سنگھ نے بتایا کہ "میٹنگ میں دی گئی ہدایت کی بنیاد پر نوئیڈا میں انفیکشن کے پھیلاؤ کو روکنے کے لیے نائٹ کرفیو کا وقت رات 8 بجے سے صبح 6 بجے تک کر دیا گیا ہے۔ سبھی متعلقہ پولس اہلکاروں کو اس ہدایت پر عمل یقینی بنانے کی ہدایت دے دی گئی ہے۔ یہ پولس اہلکار عوام سے گزارش کریں گے کہ وہ بطور خود اس ہدایت پر عمل کریں۔"

قابل ذکر ہے کہ اس سے قبل نائٹ کرفیو کا وقت رات 9 بجے سے صبح 5 بجے تک تھا۔ گویا کہ پہلے 8 گھنٹے کا کرفیو تھا جو اب بڑھ کر 10 گھنٹے کا ہو گیا ہے۔ اب لوگ رات 8 بجے کے بعد گھر سے باہر نہیں نکلیں گے اور صبح 6 بجے کے بعد انھیں گھر سے نکلنے کی اجازت ملے گی۔ اس دوران ضروری خدمات سے جڑے لوگوں کو آمد و رفت کی اجازت رہے گی۔