کورونا بحران: 70 ٹن آکسیجن لے کر ’آکسیجن ایکسپریس‘ دہلی پہنچی

نئی دہلی: قومی دارالحکومت کے مریضوں کے لئے تقریباً 70 ٹن حیات بخش آکسیجن والی پہلی آکسیجن ایکسپریس ٹرین منگل کی صبح یہاں پہنچ گئی۔ وزیر ریلوے پیوش گوئل نے ٹوئٹر پر یہ معلومات شیئر کیں۔ انہوں نے کہا کہ ’’آکسیجن ایکسپریس چھتیس گڑھ کے رائے گڑھ سے قومی دارالحکومت دہلی میں مریضوں کے لئے آکسیجن لے کر پہنچی ہے۔ ہندوستان ریلوے کووڈ۔ 19 کے خلاف ہماری لڑائی میں کوئی کسر نہیں چھوڑے گا اورملک بھر میں حیات بخش وسائل کی مناسب فراہمی کو یقینی بنائے گا۔ انہوں نے کہا کہ اس آکسیجن کو دارالحکومت کے مختلف اسپتالوں میں پہنچایا جائے گا۔

پیوش گوئل نے جنوبی دہلی کے ریلوے اسٹیشن پہنچنے والی ٹرین کی 44 سیکنڈ کی ویڈیو کے ساتھ ٹوئٹ کیا۔ انہوں نے بتایا کہ پیر کے روز چھتیس گڑھ کے رائے گڑھ میں ’جندل اسٹیل ورکس‘ سے ٹرین دہلی کے لئے روانہ ہوئی۔ ملک بھر میں آکسیجن کی بڑھتی ہوئی طلب کے پیش نظر ریلوے نے حیات بخش گیس کی طلب کو پورا کرنے کے لئے مائع میڈیکل آکسیجن لانے کے لئے آکسیجن ایکسپریس ٹرین چلانے کا فیصلہ کیا تھا۔

قومی دارالحکومت دہلی میں آکسیجن گیس کی زبردست قلت کا سامنا ہے۔ پیر کو دہلی میں کورونا کے 20201 نئے کیسز کی تصدیق ہوئی تھی اور 380 مزید افراد اس وبا کی وجہ سے ہلاک ہوگئے۔ دارالحکومت میں کورونا سے متاثرہ افراد کی کل تعداد اب 1047916 ہوگئی ہے، جبکہ اس وبا سے اب تک 14628 مریضوں کی موت ہوچکی ہے۔ گزشتہ 24 گھنٹوں کے دوران 57690 افراد کے کورونا ٹسٹ کیے گئے۔ اتوار کے 30.21 فیصد کے مقابلے میں مثبت شرح 35.02 فیصد پر پہنچ گئی۔